ممبئی (مانیٹرنگ ڈیسک) نامور بالی ووڈ اداکار عرفان خان 53 سال کی عمر میں اپنے مداحوں کو افسردہ چھوڑ کر دنیا سے رخصت ہوگئے۔
عرفان خان کی موت کی خبر کی تصدیق بالی ووڈ کے ہدایت کار و پروڈیوسر شوجیت سرکار نے اپنے ٹوئٹر اکاؤنٹ پر کی۔
https://twitter.com/ShoojitSircar/status/1255377784773410818?s=19
انہوں نے عرفان خان کو یاد کرتے ہوئے لکھا میرے پیارے دوست عرفان تم لڑے، لڑے اور لڑتے رہے، مجھے ہمیشہ تم پر فخر رہے گا، ہم دوبارہ ملیں گے۔ شوجیت سرکار نے اپنی ٹوئٹ میں عرفان خان کی اہلیہ ستاپا سے اظہار تعزیت بھی کیا اور لکھا آپ نے بھی جنگ لڑی، ستاپا آپ نے اس جنگ میں جتنا ہوسکا کیا۔ عرفان خان کو میرا سلام۔
اداکار شاہد کپور نے اپنے ایک ٹوئٹ میں کہا انہیں عرفان خان کی موت کا سن کر بہت صدمہ پہنچا ہے۔ بطور اداکار انہوں نے عرفان خان سے بہت کچھ سیکھا تھا۔
It’s so sad to hear about #IrfanKhan passing away. I have learned so much from him as an actor just by sharing screen space with him. A truly gifted actor. And a wonderful man. He really has #GoneTooSoon I’m sure the heavens have saved a special place for him.
— Shahid Kapoor (@shahidkapoor) April 29, 2020
بھارتی کرکٹر سریش رائنا نے ٹوئٹ میں لکھا کہ عرفان خان اداکاری کی صلاحیتوں سے بھرپور اداکار اور اچھی شخصیت کے مالک تھے۔ انہیں ہمیشہ یاد رکھا جائے گا۔
Extremely saddened to hear about the demise of #IrfanKhan. He was truly an actor with immense talent & high caliber. He will be missed badly. My heartfelt condolences to the family. #ripirfankhan pic.twitter.com/kXe7FfNvuP
— Suresh Raina???????? (@ImRaina) April 29, 2020
عرفان خان کو گزشتہ روز بڑی آنت میں انفیکشن کے باعث ممبئی کے کوکیلا بین اسپتال کے آئی سی یو میں داخل کیا گیا تھا۔ عرفان خان نے لواحقین میں اہلیہ ستاپا اور دو بیٹے بابیل اور ایان چھوڑے ہیں۔
یاد رہے کہ چار روز قبل عرفان خان کی والدہ سعیدہ بیگم کا بھارتی ریاست راجستھان کے شہر جے پور میں 95 سال کی عمر میں انتقال ہوگیا تھا، تاہم عرفان خان کورونا وائرس کے باعث ملک میں جاری لاک ڈاؤن کی وجہ سے اپنی والدہ کی آخری رسومات میں شرکت نہیں کرسکے تھے۔ تاہم انہوں نے اپنی والدہ کی آخری رسومات میں ویڈیو کانفرنس کے ذریعے شرکت کی تھی۔
واضح رہے کہ عرفان خان نے 2018 میں اپنے تمام چاہنے والوں کو یہ بتاکر افسردہ کردیا تھا کہ وہ نیورواینڈوکرائن ٹیومر میں مبتلا ہوگئے ہیں بعد ازاں وہ علاج کی غرض سے بیرون ملک چلے گئے تھے۔ اپنی بیماری کے باعث عرفان خان فلم ’’انگریزی میڈیم‘‘ کی تشہیر کا حصہ بھی نہیں بن سکے تھے، یہ عرفان خان کی آخری فلم تھی۔
عرفان خان کو فلم ’’پان سنگھ تو مر‘‘ میں شاندار اداکاری کرنے پر نیشنل ایوارڈ سے نوازا گیا تھا۔ اس کے علاوہ انہیں فلم ’’مقبول ‘‘ اور ’’پیکو‘‘ میں جاندار پرفارمنس دینے پر ہمیشہ یاد رکھا جائے گا۔
عرفان خان کئی ہالی ووڈ پراجیکٹ کا بھی حصہ رہ چکے ہیں جن میں ’’سلم ڈاگ ملینئر‘‘، ’’جراسک ورلڈ‘‘،’’دی امیزنگ اسپائیڈر‘‘ اور ’’لائف آف پائی‘‘ شامل ہیں۔
