کراچی (ڈیلی اردو) کاؤنٹر ٹیرارزم ڈپارٹمنٹ (سی ٹی ڈی) نے بڑی کارروائی کرتے ہوئے انتہائی مطلوب ٹارگٹ کلر کو گرفتار کرلیا۔
تفصیلات کے مطابق کراچی میں سی ٹی ڈی نے خفیہ اطلاع پر بڑی کارروائی کی، کارروائی کے دوران سنی تحریک کے ٹارگٹ کلر فضل الرحمان عرف فضلو کو گرفتار کرلیا ہے۔
https://twitter.com/ShabbirTuri/status/1498178365261447172?t=M2if0tQqVH_idboIVS3vww&s=19
سی ٹی ڈی حکام کا کہنا ہے کہ گرفتار ملزم فضل الرحمان عرف فضلو ولد سرور خان لائنز ایریا ٹارگٹ کلنگ ٹیم کا انچارج تھا، 2011 سے قتل و غارت گری میں ملوث ملزم سنی تحریک لائنزایریا کا یونٹ انچارج بھی رہا ہے۔
سی ٹی ڈی حکام نے بتایا کہ ملزم ٹارگٹ کلنگ، پولیس مقابلہ، قتل اقدام قتل کے متعدد مقدمات میں ملوث ہے جبکہ ملزم فضل الرحمان نے 2011 میں بھتہ نہ دینے پر دکاندار کو قتل بھی کیا۔
سی ٹی ڈی حکام نے بتایا کہ ملزم نے 2012 میں ایم کیو ایم کارکن صلاح الدین کو گولیاں ماریں اور اسی سال ملزم نے پولیس افسر اے ایس آئی علی محسن نقوی کو بھی قتل کیا۔
سی ٹی ڈی حکام کا کہنا تھا کہ 2012 میں ملزم نے ساتھیوں کے ہمراہ بریگیڈ پولیس اسٹیشن کی پولیس موبائل پر حملہ کیا اور 2013 میں ساتھیوں سمیت ہڑتال کے دوران گاڑی کو لوٹا پھر آگ لگا دی۔
سی ٹی ڈی حکام نے مزید بتایا کہ ملزم کے انکشافات اور تصدیق کے بعد کارروائی کے لئے متعلقہ پولیس کے حوالے کیا جا رہا ہے۔
