دمشق (ڈیلی اردو) شام میں اسرائیل کے ڈرون حملے میں حزب اللہ کے سربراہ حسن نصراللہ کے اہم ساتھی سمیت 2 افراد ہلاک ہو گئے ہیں۔
غیرملکی میڈیا کے مطابق اسرائیل نے ڈرون کے ذریعے دمشق کے دیہی علاقے میں یابوس روڈ پر فورتھ ڈویژن چیک پوائنٹ کے قریب ایک کار کو نشانہ بنایا، حملے میں لبنان کی سرحد کے قریب حزب اللہ کے رہنماؤں کو نشانہ بنایا گیا جس کے نتیجے میں دو افراد مارے گئے ہیں۔
اسرائیلی میڈیا نے دعویٰ کیا ہے کہ دمشق کے دیہی علاقوں میں ڈرون کا نشانہ حزب اللہ کی فضائی دفاعی فورس کا رکن تھا، دمشق کے علاقے میں حملے کا ہدف یاسر قرنبش نامی حزب اللہ کا ایک سینئر اہلکار تھا جو شام میں اہلکاروں اور ہتھیاروں کی منتقلی کے یونٹ میں ذمہ دار تھا۔
دوسری جانب حزب اللہ کے قریبی ذرائع نے تصدیق کرتے ہوئے بتایا ہے کہ فضائی حملے میں ہلاک ہونے والا شخص حزب اللہ ملیشیا کے سربراہ حسن نصراللہ کا سابق ساتھی تھا۔
