پنجاب: ڈیرہ غازی خان میں لکھانی پولیس چوکی پر دہشت گردوں کا حملہ

ڈی جی خان (ڈیلی اردو) پاکستان کے صوبہ پنجاب کے ضلع ڈیرہ غازی خان میں سرحدی چوکی لکھانی پر 25 سے 30 دہشت گردوں نے حملہ کیا جسے پولیس نے ناکام بناتے ہوئے دہشت گردوں کو فرار ہونے پر مجبور کردیا۔

ڈیلی اردو کے مطابق ڈیرہ غازی خان کے تھانہ وہوا کی سرحدی چوکی لکھانی پر دہشت گردوں نے رات گئے اچانک حملہ کردیا۔

25 سے 30 دہشت گرد چیک پوسٹ پر چاروں طرف سے حملہ آور ہوئے اور راکٹ، دستی بموں سمیت بھاری اسلحے کا استعمال کیا۔

پولیس نے تھرمل امیج کیمروں کی مدد سے دہشت گردوں کی نشاندہی کی۔ پولیس، ایلیٹ فورس، رینجرز اور سی ٹی ڈی اہلکاروں نے مل کر دہشت گردوں کا مقابلہ کیا۔

پولیس کے جانبازوں نے مشین اور مارٹر گنز سے فائرنگ کرکے فوری جوابی کارروائی کی۔ پولیس کی بھرپور جوابی کارروائی نے دہشت گردوں کو فرار پر مجبور کر دیا۔

ترجمان پنجاب پولیس کے مطابق موثر جوابی کارروائی کے نتیجے میں دہشت گرد بھاری جانی نقصان اٹھا کر فرار ہوگئے۔

انہوں نے کہا کہ خیبرپختونخوا بارڈر پر تمام چیک پوسٹس پہلے سے ہائی الرٹ تھیں، جس کے باعث یہ حملہ ناکام بنایا گیا۔

آئی جی پنجاب عثمان انور نے دہشت گردوں کا حملہ پسپا کرنے پر ڈیرہ غازی خان پولیس کو شاباش دیتے ہوئے کہا کہ پنجاب پولیس قبل ازیں بھی خوارجی دہشت گردوں کے کئی حملے ناکام بنا چکی ہے، دہشت گردوں کو کسی بھی صورت پنجاب میں داخل ہونے نہیں دیا جائے گا۔

وزیرداخلہ محسن نقوی کا پولیس کو خراج تحسین

ادھر وفاقی وزیرداخلہ محسن نقوی نے پنجاب کے پی کے کی سرحد لاکھانی چیک پوسٹ پر دہشتگردوں کا حملہ ناکام بنانے پر پولیس کو خراج تحسین پیش کیا ۔

محسن نقوی نے حملہ پسپا کرنے پر پولیس افسران اور جوانوں کو شاباش دیتے ہوئے کہا کہ پولیس نے بہادری کے ساتھ دہشت گردوں کے مذموم عزائم کو ناکام بنایا، پولیس نے ایک بار پھر دہشتگردوں کے ناپاک عزائم خاک میں ملائے۔

وزیر داخلہ نے کہا کہ پنجاب پولیس کے کمانڈر آئی جی عثمان انور اور ان پوری ٹیم کو مبارکباد دیتا ہوں، پنجاب پولیس نے ہمیشہ جرات اور بہادری کی تاریخ رقم کی ہے۔

بنوں کینٹ پر نامعلوم حملہ آوروں کا حملہ

دوسری جانب خیبرپختونخوا کے ضلع بنوں کینٹ پر نامعلوم حملہ آوروں نے حملہ کردیا۔

سیکیورٹی فورسز اور شرپسندوں کے مابین شدید فائرنگ کا تبادلہ ہوا تاہم فائرنگ کے نتیجے میں کوئی جانی نقصان کی اطلاع نہیں۔

حملہ آوروں نے دریا کرم کی طرف سے فائرنگ کی جبکہ سیکیورٹی فورسز کی جوابی کارروائی سے حملہ آور فرار ہو گئے۔