پاراچنار (محمد صادق) رکن قومی اسمبلی منیر خان اورکزئی پر مسلح افراد کی فائرنگ منیر خان اورکزئی حملے میں محفوظ رہے۔
جمیعت علمائے اسلام ف سے تعلق رکھنے والے رکن قومی اسمبلی منیر خان اورکزئی کے بھائی ڈاکٹر عبدالقادر کے مطابق منیر خان اورکزئی لوئر کرم کے علاقے اوچت میں کالعدم تحریک طالبان پاکستان (ٹی ٹی پی) کے سابق امیر فضل سعید کے گھر گئے تھے جہاں پر وہ حاجی کپتان کی اہلیہ کی فوتگی پر تعزیت کررہے تھے۔
ڈاکٹر عبدالقادر کا کہنا تھا جونہی منیر خان اورکزئی تعزیت کیلئے حجرے میں پہنچے تو وہاں پر موجود تین مسلح افراد نے ان پر خود کار ہتھیاروں سے فائرنگ کی تاہم منیر خان اورکزئی حملے میں محفوظ رہے اور حملے کے بعد وہ واپس اپنے گھر پہنچ گئے مقامی انتظامیہ نے واقعے کی تحقیقات شروع کردی۔
واضح رہے 2013 میں بھی کرم کے علاقے میں ہی منیر خان اورکزئی کے انتخابی جلسے میں بم دھماکا ہوا تھا جس میں 20 افراد شہید اور 96 زخمی ہوگئے تھے۔
