اسلام آباد (ڈیلی اردو) فنانشل ایکشن ٹاسک فورس کی گرے لسٹ سے نکلنے کے لیے پاکستان متحرک ہے اور اس حوالے سے پاکستانی وفد گورنر اسٹیٹ بینک آف پاکستان ڈاکٹر رضا باقر کی سربراہی میں وفد آسٹریلیا پہنچ گیا ہے۔
نیکٹا، ایف بی آر، ایس ای سی پی، اسٹیٹ بینک آف پاکستان، فنانشل مانیٹرنگ یونٹ کے حکام وفد میں شامل ہیں‘۔ پاکستان گرے لسٹ سے نکلنے کے لیے 16 اہداف کے حوالے سے سفارشات پر عملدرآمد کی رپورٹ پیش کرے گا۔ سفارشات پر عملدرآمد کی رپورت 26 صفحات پر مشتمل ہے۔
ایف اے ٹی ایف کا ایشیا پیسفک گروپ اس رپورٹ کا جائزہ لے گا۔
ذرائع کے مطابق رپورٹ میں منی لانڈرنگ اور دہشت گردوں کو فنڈز کی روک تھام کے حوالے سے اقدامات کی تفصیلات رپورٹ میں شامل ہیں جبکہ دہشت گردوں تک غیر قانونی سرمائے اور اثاثوں کی منتقلی روکنے کے لیے اقدامات بھی اس رپورٹ میں شامل کیے گئے ہیں۔
