لاہور (مانیٹرنگ ڈیسک) جمعیت علما اسلام (ف) کے سربراہ مولانا فضل الرحمٰن کا کہنا ہے کہ حکمران کشمیر کو بیچ چکے ہیں اور کشمیریوں کے ساتھ نمائشی قسم کی خیر خواہی ظاہر کی جارہی ہے۔
لاہور میں میڈیا سے غیر رسمی بات کرتے ہوئے سربراہ جمعیت علمائے اسلام (ف) مولانا فضل الرحمٰن کا کہنا تھا کہ حکومت روزانہ کئی کئی جھوٹ بول رہی ہے، کشمیریوں کے ساتھ نمائشی قسم کی خیر خواہی ظاہر کی جا رہی ہے، کشمیری اور پاکستانی قوم اب کسی خوش فہمی میں نہ رہیں، حکمران کشمیر کو بیچ چکے ہیں، عوام کو سچ بتائیں۔
میرے ہوتے ہوئے کشمیر کا سودا نہیں کیا جاسکا تھا ، میرے جانے کے بعد انہوں نے کشمیر کو بیچا pic.twitter.com/ioj7qknfsN
— Maulana Fazl-ur-Rehman (@MoulanaOfficial) August 19, 2019
مولانا فضل الرحمٰن کا کہنا تھا کہ بھارت نے کشمیر کو ضم کیا، ہمیں فاٹا کی صورت میں ضم کیا گیا، پہلے ہم سوچتے تھے کہ سری نگر کو کیسے بچائیں اور اب سوچتے ہیں کہ مظفر آباد کیسے بچائیں گے؟ کشمیر کا دارومدار اب کشمیریوں پر ہے، کشمیری جو بھی حکمت عملی بنائیں گے پاکستانی عوام ساتھ کھڑے ہوں گے۔
کشمیر کی صورتحال یکسر تبدیل ہوچکی
یہ سب کچھ اچانک نہیں ہوا، ریاستی سطح پر کشمیر کو سنجیدگی سے نہیں لیا گیا، عمران خان نے کشمیر کو مودی کی جیت سے مشروط کیا تھا، ہم انتخابات میں دھاندلی ، معاشی بحران کا شکار تھے ہی آج کشمیری بھی ان کی نالائقیوں سے دوچار ہو چکے pic.twitter.com/YCQdKa9V1J— Maulana Fazl-ur-Rehman (@MoulanaOfficial) August 19, 2019
قبل ازیں مولانا فضل الرحمٰن سے مسلم لیگ ن کے رہنما کیپٹن(ر) صفدر نے بھی ملاقات کی، ایک گھنٹہ جاری رہنے والی ملاقات میں سیاسی صورتحال، چیئرمین سینیٹ کے خلاف عدم اعتماد کی قراردار میں ناکامی سے متعلق امور پر بات چیت کی گئی اور کیپٹن صفدر نے نوازشریف کا خصوصی پیغام مولانا فضل الرحمٰن کو پہنچایا اور بتایا کہ نواز شریف نے اسلام آباد لاک ڈاون کے لیے بھرپور تعاون کی یقین دہانی کرائی۔
مولانا فضل الرحمٰن نے نواز شریف اور مریم نواز سمیت دیگر کی گرفتاریوں کے خلاف آواز اٹھانے کی یقین دہانی کراتے ہوئے کہا کہ نیب کا ادارہ حکومت کے ہاتھوں استعمال ہو رہا ہے، حکومت نیب کے ذریعے اپوزیشن جماعتوں کے قائدین کو سیاسی انتقام کا نشانہ بنا رہی ہے۔
