سرگودھا (ڈیلی اردو) صوبہ پنجاب کے ضلع سرگودھا میں خاندانی رنجش 8 جانیں لے گئی،سرگودھا میں گھریلو جھگڑے پر بھائی نے سگے بھائی کے گھر پر حملہ کردیا اور فائرنگ کرکے بھائی اور بھابھی سمیت 8 افراد کو قتل کردیا، فائرنگ کرنے والے شخص نے قتل کر نے کے بعد خود کشی کرلی،جاں بحق تمام افراد کا تعلق ایک ہی خاندان سے ہے۔
تفصیلات کے مطابق افسوسناک واقعہ کوٹ مومن کے نواحی علاقے سیال موڑ پر پیش آیا۔ پولیس کے مطابق پٹھان فیملی سے تعلق رکھنے والے نور دین نے فائرنگ کر کے اپنے بھائی، بھابیوں اور بھتیجوں کو قتل کردیا۔
تھانہ لکسیاں کے ایس ایچ او قیوم خان کے مطابق ملزم نورالدین نے اپنے تین بھائیوں اکبر خان، قلم الدین، جمال الدین، جبکہ مقتول قلم الدین کی بیوی شائستہ بی بی سمیت خاندان کی مزید دو خواتین شاہدہ بی بی زوجہ ابراہیم خان، رنگ بی بی کو قتل کردیا۔ فائرنگ کے واقعے میں دوران خان نامی شخص شدید زخمی بھی ہوا۔ جس کی حالت تشویشناک بتائی جاتی ہے۔
پولیس کے مطابق فائرنگ واقعہ کی وجہ دونوں خاندانوں میں رنجش بتائی جاتی ہے۔
میڈیا رپورٹس کے مطابق فائرنگ کا واقعہ سرگودھا کے قریب سیال موڑ میں پیش آیا جہاں خاندانی رنجش پر بھائی نے فائرنگ کرکے بھائی اور بھابھی سمیت 7 افراد کو قتل کردیا جبکہ ایک شخص دوران خان شدید زخمی ہو گیا۔
واقعہ کی اطلاع ملتے ہی پولیس جائے وقوعہ پر پہنچ گئی، ریسکیو ٹیموں نے جاں بحق افراد اور زخمی کو ہسپتال منتقل کردیا،زخمی شخص بھی ہسپتال میں دم توڑ گیا جس کے بعد ہلاکتوں کی تعداد 8 ہو گئی۔
جاں بحق ہونے والوں میں 3 خواتین اور 5 مرد شامل ہیں ہیں، قاتل کی شناخت نور دین کے نام سے ہوئی ہے۔
وزیراعلیٰ پنجاب عثمان بزدار نے سیال موڑ کے قریب فائرنگ کے واقعہ کانوٹس لے لیا، وزیراعلیٰ نے آئی جی پنجاب سے واقعہ کی رپورٹ طلب کرلی اور تحقیقات کا حکم دیدیا۔