پیرس + دہلی (ڈیلی اردو/نیوز ایجنسی) فرانس نے پہلا رافیل طیارہ آر بی 001 بھارتی فضائیہ کے ڈپٹی ائر چیف مارشل وی آر چودھری کے حوالے کر دیا۔
رواں برس فروری میں پاک فضائیہ کے شاہینوں کی جانب سے بھارتی طیاروں کو مار گرانے اور ایک پائلٹ کی گرفتاری کے بعد بوکھلاہٹ اور خوف کی شکار مودی سرکار نے فرانس سے جدید ترین جنگی جہاز رافیل کی خریداری کے عمل کو تیز تر کردیا ہے، جس کے تحت بھارتی عدالت عظمیٰ میں طیاروں کی خریداری میں ہوشربا کرپشن اور اپوزیشن کے شدید احتجاج کے باوجود جارحیت پسند بی جے پی کی حکومت نے فرانس سے پہلا رافیل طیارہ تکنیکی طور پر حاصل کرلیا ہے۔
بھارتی میڈیا کے مطابق فضائیہ کے ڈپٹی ائر چیف وی آر نے جدید جنگی رافیل طیارہ موصول کیا اور ایک گھنٹے تک فضا میں پرواز کی۔ دوران پرواز طیارے کی کارکردگی اور افعال کا جائزہ لینے کے بعد اطمینان کا اظہار کیا۔ تکنیکی حوالگی کے کامیاب مراحل کے بعد رافیل طیاروں کی باقاعدہ حوالگی 8 اکتوبر کو فرانس میں ہوگی۔
بعد ازاں 4 رافیل طیارے آیندہ برس مئی میں فراہم کیے جائیں گے، جس کے لیے بھارتی فضائیہ کے 10 پائلٹ، 10 فلائٹ انجینئر اور 40 ٹیکنیشین فرانس میں تربیت حاصل کررہے ہیں، جب کہ باقی ماندہ طیاروں کی فرانس سے بھارت کو حوالگی اپریل 2022ء تک مکمل ہوجائے گی۔
بھارت نے فرانس سے کل 36 رافیل طیارے خریدے ہیں۔ یاد رہے کہ 2012ء میں یوپی حکومت نے جیٹ طیاروں کی خریداری کا معاہدہ کیا تھا، جس کے تحت 18 جیٹ طیارے تیار حالت میں ملتے اور 108 بھارت میں تیار کیے جاتے۔ اس طرح فی طیارہ قیمت 526 کروڑ بنتی۔
اپریل 2015ء میں مودی نے فرانس کے دورے کے دوران پرانے معاہدے کو منسوخ کرتے ہوئے نیا معاہدہ کیا، جس کے تحت بھارت کو جیٹ طیاروں کے بجائے 36 رافیل طیارے ملیں گے۔ ایک طیارے کی قیمت 1666 کروڑ روپے ہوگی اور یہ سب امبانی کمپنی کو فائدہ پہنچانے کے لیے کیا گیا تھا۔
