اسلام آباد (ڈیلی اردو) وزیر ریلوے شیخ رشید نے کہا ہے کہ شہباز شریف پر23 مقدمات ہیں، اخلاقی تقاضا ہے کہ وہ پی اے سی کی چیئرمین شپ سے مستعفی ہوجائیں۔
ان خیالات کا اظہار انھوں نے پریس کانفرنس کرتے ہوئے کیا. شیخ رشید کا کہنا تھا کہ مجھے پی اے سی میں جانے کا شوق ہے، سیاست کوسمجھتا ہوں، عمران خان اور پی ٹی آئی کی محنت دیکھی ہے۔
انھوں نے کہا کہ نوازشریف کو پتھری کی بیماری ہے، یہ توغریب کی بیماری ہے، انھیں کیسے ہو گئی، شہباز شریف پر 23 مقدمات ہیں، اسپیکر صاحب کو کہتا ہوں کہ ریمانڈ میں کسی کے پروڈکشن آرڈر جاری نہیں ہوتے۔
انھوں نے بلاول بھٹو کی تنقید کا جواب دیتے ہوئے کہا کہ بلاول کو میں نے کہا ہے، معافی مانگ لے، ورنہ میں بھی جواب دوں گا، بلاول نے میرے خلاف افسوس ناک زبان استعمال کی، میں تو بلورانی پیار سے کہتا ہوں۔
شیخ رشید کا مزید کہا کہ مہنگائی ان لٹیروں اورچوروں کی وجہ سے ہے، قوم ان چوروں اور ڈاکوؤں سے نجات چاہتی ہے، مہنگائی برداشت کرلی جائے گی، لیکن اگر چور باہر گئے تو سسٹم پرعوام کا اعتماد ختم ہو جائے گا۔
وزیر ریلوے شیخ رشید کا کہنا تھا کہ عمران خان کے ساتھ کھڑا ہوں، ان کی محنت دیکھی ہے، ان کا ممنون ہوں، میری بات سنتے ہیں.
انھوں نے کہا کہ اپنا دفتر کراچی لے گیا ہوں، ٹرین چاہییں یا بوگیاں، دینے کے لئے تیار ہیں، ہم تیارہیں، ہمارے پاس کوچز ہیں.
