واشنگٹن (ڈیلی اردو) امریکی وزیر خارجہ نے ترکی کو خبر دار کرتے ہوئے کہا ہے کہ صدر ڈونلڈ ٹرمپ ضرورت پڑنے پر ترکی کے خلاف بھر پور طاقت کے استعمال کرنے کیلئے پوری طرح تیار ہیں۔
امریکی ٹی وی چینل سی این بی سی کو دیئے گئے انٹرویو میں مائیک پومپیو نے کہا کہ واشنگٹن جنگ پرامن کو ترجیح دیتا ہے تاہم اگر فوجی کارروائی کی ضرورت پڑی تو ٹرمپ ایسا کرنے کیلئے پوری طرح تیار ہیں۔
اس سے قبل شام میں کرد باغیوں کے خلاف ترکی کے فوجی آپریشن پر امریکی صدر نے موقف اپنایا تھا کہ شمالی شام میں جنگ بندی کی کچھ معمولی خلاف ورزیوں کے باوجود اس پرعمل درآمد کیا جا رہا ہے۔ ہم ترکی کو مزید پابندیوں کی دھمکی نہیں دینا چاہتے۔ اگر ترکی غلط برتاؤ کا مظاہرہ کرتاہے تو امریکا اپنی مصنوعات پر محصولات اور پابندیاں عائد کرے گا۔
دوسری جانب ترک عسکری ذرائع نےبتایا کہ انقرہ اور واشنگٹن کے درمیان 120 گھنٹوں کیلئے طے پائی جانے والی فائر بندی منگل کے روز اختتام پذیر ہورہی ہے۔ کرد جنگجو شمال مشرقی شام میں اپنے ٹھکانوں کو خالی کر کے چلے جائیں۔
واضح رہے کہ ترک فورسز نے امریکی نائب صدر سے ملاقات کے بعد کرد جنگجوؤں کو 120 گھنٹے کی مہلت دی تھی کہ وہ اس دوران قابض علاقے چھوڑ جائیں ورنہ ہم کارروائی کا آغاز دوبارہ کریں گے۔
