بہاولنگر (ڈیلی اردو) صوبہ پنجاب کے ضلع بہاولنگر میں فورٹ عباس کے قریب تیز رفتار مسافر بس الٹ گئی جس کے نتیجے میں 7 مسافر جاں بحق جبکہ 18 زخمی ہوگئے۔
تفصیلات کے مطابق بہاول نگر میں فورٹ عباس کے قریب مسافر بس حادثے کا شکار ہو گئی۔
ریسکیو کے مطابق حادثے کے زخمیوں کو تحصیل ہیڈ کوارٹر ہسپتال منتقل کیا گیا۔
ہسپتال ذرائع کے مطابق فورٹ عباس کے قریب پیش آنے والے حادثے میں ابتدائی طور پر 5 افراد جاں بحق ہوئے جب کہ بعد ازاں دو زخمی دوران علاج دم توڑ گئے۔
ہسپتال ذرائع کا مزید کہنا ہے کہ فورٹ عباس کے قریب ٹریفک حادثے میں 18 مسافر زخمی ہوئے جنہیں طبی امداد دی جا رہی ہے۔
پولیس کے مطابق بس دھند میں تیزرفتاری کے سبب حادثے کا شکار ہوئی۔
وزیر اعلیٰ پنجاب سردار عثمان بزدار نے فورٹ عباس میں ٹریفک حادثے میں قیمتی انسانی جانوں کے ضیاع پر دکھ اور افسوس کا اظہار کیا ہے جبکہ انتظامیہ کو زخمی افراد کو علاج معالجے کی بہترین سہولتیں فراہم کی جانے کی ہدایت کی ہے۔
