دمشق (ڈیلی اردو) شام کے شہر ادلب میں روسی جنگی طیاروں کی بمباری سے 9 خواتین سمیت 15 شہری شہید ہوگئے۔
غیر ملکی خبر رساں ادارے کے مطابق معرۃ المصرین کے علاقے میں ہونے والے اس حملے میں ایک پولٹری فارم کو نشانہ بنایا گیا جہاں شامی حکومت کے زیر انتظام حلب کے مغربی اور ادلب کے جنوبی علاقوں سے بے گھر ہونے والے 50 کے قریب افراد پناہ گزین تھے۔
ایک ہسپتال ورکر کا کہنا ہے کہ بدھ اور جمعرات کی درمیانی شب روسی جنگی طیاروں نے پولٹری فارم پر 8 میزائل داغے۔ عینی شاہدین کے مطابق شہدا میں 6 ماہ سے کم عمر کے 2 بچے اور 9 خواتین بھی شامل ہیں۔
کارروائی روس اور ترکی کے مابین ادلب کی صورت حال اور جنگ بندی پر ماسکو میں مذاکرات سے چند گھنٹے پہلے کی گئی ہے۔ ترکی گزشتہ ہفتے اپنے 33 فوجیوں کی ہلاکت کے بعد شام میں کارروائیوں کا آغاز کرچکا ہے۔
گزشتہ دسمبر سے 10 لاکھ سے زائد شامی شہری ملک کے اندر ترکی کے سرحدی علاقوں میں بے گھر ہوکر منتقل ہوچکے ہیں۔
اقوام متحدہ نے اسے بدترین انسانی المیہ قرار دیا ہے۔
