سکردو (ڈیلی اردو) پاکستان کے شمالی صوبے گلگت بلتستان کے ضلع سکردو میں بس موڑ کاٹتے ہوئے دریائے سندھ میں جاگری، حادثے میں 20 افراد جاں بحق جبکہ پانچ شدید زخمی ہوگئے ہیں۔
اطلاعات کے مطابق کوسٹر راولپنڈی سے سکردو جا رہی تھی کہ موڑ کاٹتے ہوئے گہری کھائی میں جاگری، گاڑی میں پاک فوج کے چھ جوانوں سمیت 25 مسافر سوار تھے۔ حادثے میں 20 مسافر جاں بحق ہو گئے جبکہ 12 لاشیں نکال گئی۔ گہری کھائی اور دریا میں پانی زیادہ ہونے سے آپریشن میں مشکلات کا سامنا ہے۔
پولیس کے مطابق حادثہ یولبو کے مقام پر موڑ کاٹتے ہوئے پیش آیا، مسافروں کو نکالنے کیلئے امدادی کارروائیاں جاری ہیں۔
اسسٹنٹ کمشنر روندو کا کہنا ہے کہ پانچ افراد باہر گرنے کی وجہ سے شدید زخمی ہو گئے، حادثے میں زخمی افراد کو طبی امداد کیلئے ہسپتال پہنچا دیا گیا جن کی حالت تشویشناک بتائی جاتی ہے جبکہ ڈی سی سکردو کاکہنا ہے کہ ریسکیو کیلئے پاک آرمی کے ہیلی کاپٹر کی بھی مدد لی جا رہی ہے۔
