اسلام آباد (ڈیلی اردو) آئی جی ایف سی بلوچستان نے کہا ہے کہ حیات بلوچ کا قتل ایف سی اہلکار نے کیا، یہ ادارے کی غفلت نہیں، ایک فرد کی غفلت ہے جسے قانون کے حوالے کیا جاچکا ہے۔
حیات بلوچ کی ہلاکت پر آئی جی ایف سی بلوچستان سرفراز علی نے بلوچستان کی سینیٹ قائمہ کمیٹی برائے انسانی حقوق کو بریفنگ دیتے ہوئے کہا کہ حیات بلوچ کا واقعہ گیارہ بج کر 45 منٹ پر پیش آیا، ہمارے کارواں کے سامنے موٹر سائیکل سوار نے دھماکہ کیا جس میں ہمارے تین سپاہی زخمی ہوئے۔
آئی جی نے بتایا کہ دھماکے کے بعد فورسز نے علاقے کو گھیرے میں لیکر سرچ آپریشن شروع کیا، حیات بلوچ اپنے والد کے ساتھ کھجور کے باغ میں کام کر رہا تھا، ہم نے پوچھ گچھ کیلئے اسے بلا کر سائیڈ پر بٹھایا، اسی دوران ایک اہلکار شادی اللہ نے حیات پر فائرنگ کردی۔
سرفراز علی نے مزید کہا کہ ہم نے اہلکار کو پکڑ لیا اور ہتھیار قبضے میں کرلئے، شادی اللہ پر ایف آئی آر درج کر لی گئی ہے، حیات بلوچ کا واقعہ ایک شخص کی غفلت ہے ادارے کی نہیں۔
