کراچی (ڈیلی اردو) جامعہ فاروقیہ کے مہتمم مولانا ڈاکٹر عادل خان اور ان کے ڈرائیور کے قتل کا مقدمہ درج کرلیا گیا۔
پولیس کے مطابق جامعہ فاروقیہ کے مہتمم مولانا ڈاکٹر عادل اور ڈرائیور کے قتل کا مقدمہ شاہ فیصل تھانے میں درج کیا گیا ہے جس میں انسداد دہشتگردی کی دفعات بھی شامل کی گئی ہیں۔
ایس ایچ او شاہ فیصل کالونی کی مدعیت میں درج مقدمے کے مطابق رات پونے 8 بجے 15 کے ذریعے شمع شاپنگ سنٹر پر فائرنگ کی اطلاع موصول ہوئی اور 7 بج کر 50 منٹ پر پولیس جائے وقوعہ پر موجود تھی۔
ایف آئی آر کے مطابق تین ملزمان جس میں سے ایک نے شلوار قمیض اور دو نے پینٹ شرٹ پہن رکھی تھی، گاڑی پر پستول سے فائرنگ کی اور موٹر سائیکل پر بیٹھ کر فرار ہوگئے۔
ایف آئی آر میں کہا گیا ہے کہ فائرنگ سے دو افراد زخمی ہوئے جنہیں ہسپتال بھیجا گیا تاہم وہ جانبر نہیں ہوسکے جبکہ جائے وقوعہ سے نائن ایم ایم گولیوں کے پانچ خول ملے تھے۔
مقدمہ درج ہونے کے بعد تفتیش سی ٹی ڈی کو منتقل کردی گئی۔
