طولکرم (ڈیلی اردو) اسرائیلی فوج نے مقبوضہ مغربی کنارے کے شمالی شہر طولکرم میں ‘دیوار فاصل’ کے قریب ایک فلسطینی مزدور کو گولی مار دی جس کے نتیجے میں وہ زخمی ہوگیا۔ یہ واقعہ طولکرم میں فرعون کے مقام پر پیش آیا۔
عینی شاہدین نے مرکز اطلاعات فلسطین کو بتایا کہ اسرائیلی فوجیوں نے فلسطینی مزدور جس کی عمر 20 سال کے قریب بتائی جاتی ہے کو دیوار عبور کرنے کی کوشش کے دوران گولی ماری۔ اسے شدید زخمی حالت میں شہید ثابت ثابت ہسپتال منتقل کیا گیا ہے جہاں اس کی حالت خطرے میں بیان کی جاتی ہے۔
قبل ازیں طولکرم سے سنہ 1948ء کے مقبوضہ فلسطینی علاقوں میں جانے کی کوشش کے دوران 6 فلسطینی مزدوروں کو گولیاں مار کر شدید زخمی کر دیا تھا۔
مقامی ذرائع کا کہنا ہے کہ اسرائیلی فوج نے البوابہ کے مقام پر فلسطینی مزدووں کو گولیاں ماریں جس کے نتئجے میں کم سے کم 6 مزدور شدید زخمی ہوگئے۔
ادھر شہید ثابت ثابت ہسپتال کے ڈائریکٹر نے بتایا کہ ہسپتال میں لائے گئے زخمیوں کی ٹانگوں میں گولیاںلگی ہیں۔ ان میں سے دو کی پنڈلیوں کی ہڈیاں ٹوٹ چکی ہیں۔
