لاہور (ڈیلی اردو) پولیس نے سانحہ سیالکوٹ کا ابتدائی چالان تیار کرلیا، جس میں 85 ملزمان کو نامزد کیا گیا اور 10 سے 12 مرکزی ملزمان قرار دیئے گئے ہیں۔
تفصیلات کے مطابق سیالکوٹ میں سری لنکن شہری کے قتل کیس میں اہم پیشرفت سامنے آئی، ذرائع کا کہنا ہے کہ پولیس نے سانحہ سیالکوٹ کا ابتدائی چالان تیار کر لیا ہے، چالان میں 85 ملزمان کو نامزد کیا گیا۔
ذرائع نے بتایا ہے کہ پولیس چالان میں 10 سے 12 مرکزی ملزمان قرار دیئے گئے، مرکزی ملزمان میں متعدد فیکٹری کے ملازمین شامل ہیں۔
ذرائع کے مطابق پولیس چالان میں مرکزی ملزمان کا کردار تحریر کیا گیا ہے، مرکزی ملزمان کو سی سی ٹی وی سمیت دیگر شواہد سے شناخت کیا گیا جبکہ ملزمان کی فرانزاک رپورٹس بھی شامل ہیں۔
تفتیشی ٹیم اور پراسکیوشن منظوری کے بعد چالان عدالت میں پیش کیا جائے گا۔
واضح رہے کہ سیالکوٹ میں واقع لیدر فیکٹری میں کام کرنے والے غیرملکی مینیجر پریانتھا کو ملازمین نے توہین مذہب کا الزام لگا کر بہیمانہ تشدد کا نشانہ بنا کر ہلاک کیا اور پھر لاش کو چوک پر نذر آتش کردیا تھا۔
