نیو یارک (ڈیلی اردو) یوٹیوب نے معروف اسکالر ڈاکٹر اسرار کا چینل بند کردیا۔
عالمی سطح پر ویڈیو شیئرنگ کی سب سے بڑی ویب سائٹ یوٹیوب نے یہود مخالف لیکچرز کو بنیاد بناکر معروف اسکالر ڈاکٹر اسرار کا یوٹیوب چینل معطل کردیا۔
ڈاکٹر اسرار کے یوٹیوب چینل پر سبسکرائبرز کی تعداد 3 ملین (30 لاکھ) کے قریب ہے جب کہ ان کے لیکچرز کو سننے والوں اور سراہنے والوں کی بڑی تعداد موجود ہے۔
یوٹیوب نے ڈاکٹر اسرار احمد کے چینل کے خلاف ایکشن کا فیصلہ اخبار جیوش کرونیکل میں ڈاکٹر اسرار احمد کے خلاف مختلف رپورٹس شائع ہونے کے بعد کیا۔
رپورٹس میں الزام لگایا گیا تھا کہ ٹیکساس میں یہودی عبادت خانے کو یرغمال بنانے والا برطانوی نژاد پاکستانی ملک فیصل اکرام، ڈاکٹر اسرار کے لیکچرز سے متاثر تھا۔
یوٹیوب کی جانب سے جاری بیان میں کہا گیا ہے کہ ڈاکٹر اسرار کے دو چینلز کو نفرت انگیز اور تشدد سے متعلق پالیسیوں کی خلاف ورزی پر بند کیا گیا ہے۔
یوٹیوب کی جانب سے معروف اسکالر کا چینل معطل کیے جانے کے بعد ان کے چاہنے والے سیخ پا ہیں جن کا کہنا ہے کہ ڈاکٹر اسرار احمد عظیم اسکالر ہیں جنہوں نے کبھی بھی تشدد کی تبلیغ نہیں کی، وہ ہمیشہ اپنے چاہنے والوں کو تعلیم اور نئی ٹیکنالوجی کے حصول کی ترغیب دیتے ہیں۔
دوسری جانب تنظیم اسلامی کے امیر شجاع الدین شیخ نے یوٹیوب پر ڈاکٹر اسرار احمد آفیشل یوٹیوب چینل کو بند کرنے کی شدید مذمت کرتے ہوئے اسے اسلاموفوبیا کی بدترین شکل قرار دیا ہے۔
Asalamu Alaikum WrWb.
Removal of the Dr. Israr Ahmad Official #YouTube channel is a blatant act of #Islamophobia. Tanzeem-e-Islami has commenced a robust legal and procedural action in response to this shameful act on all relevant and concerned platforms.
Was Salam pic.twitter.com/KB5wpA8gNl— Tanzeem-e-Islami (@tanzeemorg) April 2, 2022
امیر شجاع الدین شیخ کا کہنا ہے کہ اسلاموفوبیا کے اس شرمناک فعل کے جواب میں تنظیم اسلامی نے متعلقہ پلیٹ فارمز کے ذریعے بھرپور قانونی چارہ جوئی کا آغاز کر دیا ہے۔
