مردان (ڈیلی اردو) خیبر پختونخوا کے ضلع مردان کے علاقہ سکندری سٹاپ کے قریب مسلح شخص نے سابقہ دشمنی کی بناء پر اپنے مخالف کو فائرنگ کرکے قتل کردیا، واردات کے بعد ملزم نے گرفتاری کی کوشش کرنے والے ٹریفک آفیسر پر بھی فائرنگ کردی جس کے نتیجہ میں وہ بھی جاں بحق ہوگیا۔
تفصیلات کے مطابق ضلع مردان صوابی روڈ پرسکندری سٹاپ کے قریب 18 سالہ نوجوان مدثر ساکن کاٹلنگ پر ایک مسلح شخص نے فائرنگ کی جس کے نتیجہ میں وہ موقع پر ہی جاں بحق ہوگیا جبکہ واردات کے بعد ملزم فرار ہو رہا تھا کہ اس دوران موقع پر موجود ٹریفک ٹکٹنگ آفیسر عطاءاللہ نے اُسے پکڑنے کی کوشش کی جس پر ملزم نے اُس پر بھی فائرنگ کردی جس کے نتیجہ میں عطاء اللہ شدید زخمی ہوگیا۔
ریسکیو ذرائع کے مطابق زخمی پولیس آفیسر کو فوری طورپر طبی امداد کیلئے تشویشناک حالت میں پشاور کے لیڈی ریڈنگ ہسپتال منتقل کردیا جہاں بعد ازاں وہ علاج کی فراہمی کے دوران دم توڑ گیا۔
پولیس کے مطابق واقعے کا مقدمہ درج کرکے ملزم کو تلاش کرنے شروع کر دیا ہے۔
