غزہ (ڈیلی اردو) اسرائیلی پولیس نے مشرقی بیت المقدس میں ایک چھاپے کے دوران پولیس اہلکاروں کو چاقو گھونپنے کی کوشش کرنے پر ایک فلسطینی شخص کو گولی مار کر ہلاک کر دیا ہے۔
اسرائیلی پولیس نے پیر کے روز ایک بیان میں کہا کہ فلسطینی شہری اور اس کے خاندان کے کچھ ممبران کی اسرائیلی پولیس اہلکاروں کے ساتھ جھڑپ اس وقت ہوئی جب وہ غیرقانونی ہتھیاروں کی تلاش کیلئے مشرقی بیت المقدس کے شمالی حصے میں ان کے گھر کے قریب پہنچے۔
بیان میں کہا گیا ہے کہ مرکزی مشتبہ شخص نے ہاتھ میں چاقو تھاما ہوا تھا اور اس سے اہلکاروں پر وار کرنے کی کوشش کی گئی جس پر اسے گولی مار کر ہلاک کر دیا گیا۔
بیان میں مزید کہا گیا ہے کہ اسرائیلی فوجی پیرا میڈیکس سے طبی امداد موصول ہونے کے بعد اسے مردہ قرار دیدیا گیا۔
فلسطین کی سرکاری خبررساں ایجنسی وافا نے مقتول کی شناخت 21 سالہ محمد ابراہیم شہام کے نام سے ظاہر کرتے ہوئے بتایا کہ اسے پوائنٹ بلینک رینج سے گولی مار کر ہلاک کیا گیا ہے۔
