پشاور (ڈیلی اردو/وی او اے) خیبر پختونخوا کی وادیٴ سوات میں نامعلوم موٹرسائیکل سوار عسکریت پسندوں نے اسکول کی ایک گاڑی پر حملہ کیا ہے۔ فائرنگ سے نشانہ بننے والوں میں شامل گاڑی کا ڈرائیور ہلاک جب کہ دو کمسن طلبہ زخمی ہوئے ہیں۔
اطلاعات کے مطابق پیر کی صبح گلی باغ کے علاقے میں اسکول کے طلبہ کو لے جانے والی گاڑی پر فائرنگ کی گئی۔ فائرنگ سے زخمی ہونے والے طلبہ کو خوازہ خیلہ اسپتال منتقل کیا گیا۔
خوازہ خیلہ اسپتال کے ڈاکٹروں کے مطابق فائرنگ کے واقعے میں زخمی ہونے والےدونوں زخمی طلبہ کی حالت تسلی بخش ہے۔
سوات کے سینئر صحافی عیسی خان خیل نے وائس آف امریکہ کو اس واقعے کے حوالے سے بتایا کہ اسکول کی جس گاڑی کو نشانہ بنایا گیا ہے، وہ تحصیل چارباغ کے ایک نجی اسکول ’دی نالج‘ کے طلبہ کو لے جا رہی تھی۔
مقدمہ درج، تفتیش شروع
ان کا مزید کہنا تھا کہ گاڑی میں زیادہ تر گلی باغ کے ایک گاؤں کے بچے سوار تھے جب کہ گاڑی پر گلی باغ کے نواح میں موٹر سائیکل سوار مسلح افراد نے حملہ کیا۔ فائرنگ کے نتیجے میں ڈرائیور موقع پر ہلاک ہو گیا تھا جب کہ دو کمسن طلبہ زخمی ہوئے ہیں۔
عیسی خان خیل نے بتایا کہ پولیس اہلکاروں نے مقدمہ درج کرکے تفتیش شروع کر دی ہے۔
The attack on a school van in Swat should serve as a wake up call for the state that appears to be losing its writ in Swat once again. The people of Swat have been protesting against terrorism but their voices are being ignored. Pashtuns are being thrown to the wolves again.
— Mohsin Dawar (@mjdawar) October 10, 2022
سرچ آپریشن کا آغاز
دہشت گردی اور تشدد کے حالیہ واقعات کے بارے میں سوات کے پولیس حکام یا سول انتظامیہ کچھ بتانے سے گریز کرتی رہی ہے۔
عیسیٰ خان خیل کا مزید کہنا تھا کہ فائرنگ کے واقعے کے بعد پولیس اور دیگر سیکیورٹی اداروں کے اہلکاروں کی بڑی تعداد نے جائے وقوع کو گھیرے میں لے لیا تھا جب کہ علاقے میں سرچ آپریشن شروع کر دیا گیاہے۔
سیکیورٹی اداروں کی جانب سے سرچ آپریشن کی تفصیلات ابھی تک سامنے نہیں لائی گئیں۔
’ڈرائیور ہی کو نشانہ بنایا گیا‘
ملاکنڈ ڈویژن کے ڈپٹی انسپکٹر جنرل (ڈی آئی جی) پولیس ذیشان اصغر نے وائس آف امریکہ کو بتایا کہ ابھی تحقیقات شروع کی گئی ہیں اور اس کی تکمیل پر اس واقعے کی نوعیت کے بارے میں کچھ کہا جا سکے گا۔
#swat school van firing. Reports suggest driver of a school van was killed and 2 students injured when gunmen fired at a school van at Khwazakhela area. pic.twitter.com/3wkhvEMwOw
— Tahir Khan (@taahir_khan) October 10, 2022
ڈی آئی جی پولیس کا دعویٰ تھا کہ حملہ آوروں کا نشانہ طلبہ نہیں تھے بلکہ انہوں نے ڈرائیور ہی کو نشانہ بنایا تھا۔
ہلاک ڈرائیور کے ورثا کا احتجاج
صحافی عیسیٰ خان خیل کہتے ہیں کہ مقامی لوگوں کے بقول حملہ آوروں میں سے ایک کا ہیلمٹ اور سردی سے بچنےکے لیے پہنا گیا جیکٹ جائے وقوع پر ہی رہ گیا ہے جو پولیس نے قبضے میں لیا ہے۔
ورثا اور مقامی افراد نے ہلاک ہونے والے ڈرائیور کی لاش کے ہمراہ خوازہ خیلہ میں احتجاج بھی شروع کر دیا ہے۔
سوات کے علاقے گلی باغ میں سکول وین پر نامعلوم افراد کی فائرنگ، ڈرایئور جاں بحق،وین میں موجود 2 بچے زخمی،پولیس
— Tariq Afghan (@afghan_tariq) October 10, 2022
’سوات کے حالات قابو میں ہیں‘
خیبر پختونخوا کی کابینہ میں شامل وزیر اور صوبے کی حکمران جماعت تحریکِ انصاف کے رہنما شوکت علی یوسف زئی نے کہا ہے کہ سوات میں پرانے حالات واپس نہیں آئیں گے۔ البتہ انہوں نے تصدیق کی کہ دہشت گردی مکمل طور پر ختم نہیں ہوئی ۔
پشاور پریس کلب میں پیر کو صحافیوں سے گفتگو میں سوات میں تشدد کے بڑھتے ہوئے واقعات کے بارے میں ان کا کہنا تھا کہ سوات کے حالات قابو میں ہیں جب کہ کچھ گرفتاریاں بھی ہوئی ہیں۔
انہوں نے سوات اور صوبے کے دیگر علاقوں میں عسکریت پسندوں کے خلاف کارروائی یا ان کو سرحد پار افغانستان بھگانے کے بارے میں سوال کا کوئی واضح جواب نہیں دیا۔ ان کا کہنا تھا کہ پاکستان کی فوج نے بے مثال طریقے سے کام کرتے ہوئے امن قائم کیاہے۔
ان کا کہنا تھا کہ دہشت گردی اور تشدد کے واقعات ردِ عمل کے طورپر ہوتے رہتے ہیں۔
مٹہ میں دھماکہ
ادھر سوات ہی کی تحصیل مٹہ کے پہاڑی علاقے بالا شور کے غیر آباد علاقے میں بم دھماکہ ہوا۔
اس دھماکے میں کسی قسم کے مالی یا جانی نقصان کے بارے میں کوئی اطلاعات موصول نہیں ہوئی۔
مٹہ کے پولیس حکام کا کہنا ہے کہ متعلقہ علاقے میں اہلکار روانہ کر دیے گئے ہیں اور ان سے موصول ہونے والے اطلاعات کا انتظار ہے۔
