انقرہ (ڈیلی اردو/رائٹرز) ترکی کے دارالحکومت انقرہ میں 5 افغان باشندوں کی ایک ہفتے پرانی لاشیں ملی ہیں جنھیں مبینہ طور پر تیز دھار چاقو کے وار کر کے قتل کیا گیا تھا۔
عالمی خبر رساں ادارے رائٹرز کے مطابق ترکی کے دارالحکومت انقرہ میں ایک گھر سے 5 افغانیوں کی لاشیں ملی ہیں۔ لاشوں پر تیز دھار چاقو کے ضربوں کے گہرے زخم بھی موجود ہیں۔ مقتولین کی شناخت ظاہر نہیں کی گئی۔
ترکی کی سرکاری خبر رساں ایجنسی انادولو کی رپورٹ میں کہا گیا ہے کہ مقتولین کے لواحقین نے پولیس میں ان پانچوں کے لاپتہ ہونے کی رپورٹ درج کرائی تھی تاہم مزید تفصیلات ان کے اہل خانہ کو بھی معلوم نہیں۔
پولیس کا کہنا ہے کہ لاشوں کو پوسٹ مارٹم کے لیے اسپتال منتقل کردیا گیا ہے۔ قتل کی لرزہ خیز واقعے کی تحقیقات جاری ہیں تاہم ابتدائی طور پر قتل کے محرکات کا اندازہ نہیں ہوسکا۔
ادھر غیر ملکی خبر رساں ادارے رائٹرز نے واقعے کی تفصیلات اور مقتولین کی شناخت کے بارے میں معلومات حاصل کرنے کے لیے ترک وزارت خارجہ کو ای میل کی تاہم فوری طور پر جواب نہیں دیا گیا۔
تاحال مقتولین کے لواحقین بھی میڈیا کے سامنے نہیں آئے اور نہ ہی افغانستان کی طالبان حکومت کی جانب سے کوئی بیان سامنے آیا۔
