لاہور (ڈیلی اردو) صوبہ پنجاب میں کاؤنٹر ٹیررازم ڈیپارٹمنٹ نے انٹیلیجنس بیسڈ آپریشن کے دوران 4 دہشت گردوں کو گرفتار کرلیا۔
تفصیلات کے مطابق کاؤنٹر ٹیررازم ڈیپارٹمنٹ کے حکام نے کہا ہے کہ سرگودھا، راولپنڈی اور گوجرنوالہ میں دہشت گردی کے خدشات کے پیش نظر سی ٹی ڈی نے بڑی کارروائیوں میں چار دہشت گرد گرفتار کر لیے۔
سی ٹی ڈی حکام کے مطابق گرفتار دہشت گردوں میں کالعدم تحریک طالبان پاکستان کے 2 ارکان سلمان اور ملک اسرار، کالعدم تنظیم داعش کے 2 ارکان شیر زمان اورشیر محمد شامل ہیں۔
دہشتگردوں کے قبضے سے دھماکہ خیز 520 گرام، ایک عدد آئی ای ڈی بم، 2 عدد راکٹ شیل، 7عدد بوسٹر شیل آر پی جی 4 عدد ڈیٹونیٹر، حفاظتی فیوز وائر 6 فٹ، پرائما کارڈ 2عدد، ایک پستول اور 6 گولیاں، 26 پمفلٹ، 30 اسٹیکرز، ایک موبائل فون اور 24340 روپے سمیت دیگر سامان برآمد کیا گیا ہے۔
ترجمان نے کہاکہ دہشت گردوں نے صوبہ بھر میں تخریب کاری کا منصوبہ بنا رکھا تھا اور وہ اہم تنصیبات اور مذہبی مقامات کو ٹارگٹ کرنا چاہتے تھے۔
حکام کا کہنا ہے کہ گرفتار مبینہ دہشت گردوں کے خلاف راولپنڈی، سرگودھا، اور گوجرانوالہ میں 4 ایف آئی آرز درج کروا کے تفتیش کے لیے ان کو نامعلوم مقام پر منتقل کر دیا گیا ہے۔
سی ٹی ڈی حکام کے مطابق رواں ہفتے 248 کومبنگ آپریشنز کے دوران 51 مشتبہ افراد گرفتار کیے گئے ہیں، کومبنگ آپریشنز میں گیارہ ہزار پانچ سے زائد افراد سے پوچھ گچھ کی گئی۔
حکام کا کہنا ہے کہ سی ٹی ڈی محفوظ پنجاب کے ہدف پر عمل پیرا ہے، دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔
