سکھر (ڈیلی اردو) صوبہ سندھ کے ضلع سکھر میں سی ٹی ڈی نے کارروائی کرتے ہوئے بس ٹرمینل سے کالعدم تنظیم کے اہم کارکن نور احمد ابڑو کو گرفتار کرلیا۔
سی ٹی ڈی حکام کے مطابق ملزم کاتعلق کالعدم تنظیم سندھو دیش ریولیشنری آرمی (ایس آر اے) سے ہے، کالعدم تنظیم کے لیے مختلف علاقوں سے فنڈ جمع کرکے سکھر پہنچا تھا۔
ذرائع کے مطابق ملزم کا تعلق شکارپور ضلع کے علاقے مرشد آباد سے ہے، ملزم کے خلاف سندھ کے مختلف اضلاع میں 13 سے زائد مقدمے درج ہیں، ملزم کے بھائی منیر ابڑو کو کچھ عرصہ قبل سی ٹی ڈی حیدرآباد نے گرفتار کیا تھا۔
سی ٹی ڈی حکام کا کہنا ہے کہ گرفتار ملزم اپنے بھائی منیر ابڑو کو چھڑوانے اور تنظیم کی مالی معاونت کے لیے فنڈ جمع کررہا تھا، نور احمد ابڑو بڑے گھروں میں ڈکیتی اور ایکسپلوز ایکٹ میں متعدد بار گرفتار ہوچکا ہے۔
گرفتار ملزم کے قبضے سے 35 ہزار روپے نقد، ایس آر اے کی رسید بک، پسٹل اور گولیاں برآمد ہوئی ہیں۔
