مریدکے (نمائندہ ڈیلی اردو) صوبہ پنجاب کے ضلع شیخوپورہ کی تحصیل مریدکے میں نامعلوم افراد کی اندھا دھند فائرنگ سے نوجوان صحافی امانت علی ہلاک جبکہ 3 افراد زخمی ہوگئے۔
پولیس کے مطابق نامعلوم افراد نے روزنامہ صحافت اخبار سے وابستہ صحافی امانت علی چوہان پر اندھا دھند فائرنگ کی جس سے وہ موقع پر ہلاک ہوگیا جبکہ فائرنگ کی زد میں آکر تین راہگیر بھی شدید زخمی ہوگئے۔
زخمی ہونے والوں میں 18 سالہ فیضان، 17 سالہ ذیشان اور 26 سالہ عمر شامل ہیں جنہیں تشویشناک حالت میں ٹی ایچ کیو ہسپتال سے لاہور منتقل کردیا گیا ہے۔
ملزمان فائرنگ کرتے ہوئے موقع سے فرار ہونے میں کامیاب ہوگئے جبکہ پولیس نے تفتیش شروع کردی۔
واقعے پر اب تک صوبائی حکومت کی جانب سے کوئی بیان یا رد عمل سامنے نہیں آیا ہے۔
دوسری جانب صحافتی تنظیمیں اور صحافی اس نوجوان صحافی ہلاکت کی شدید الفاظ میں مذمت کے ساتھ صوبائی حکومت پنجاب سے قتل کے اصل محرکات کو سامنے لانے کا مطالبہ کیا ہے۔
