کراچی (ڈیلی اردو) سندھ ہائی کورٹ نے فرقہ ورانہ قتل میں سزا پانے والے 2 ملزمان کی اپیلوں پر کیس کی سماعت کے دوران سزا کو کالعدم قرار دے دیا۔
عدالت نے فرقہ ورانہ قتل کیس میں سزا کے خلاف 2 ملزمان ابوتراب اور فیصل محمود کی اپیلوں کو منظور کر لیا اور ان کی عمر قید کی سزا پر فیصلہ سناتے ہوئے اسے کالعدم قرار دے دیا۔
عدالت کا کہنا ہے کہ ملزمان کی شناخت پریڈ میں قانونی تقاضے پورے نہیں کیے گئے، پراسیکیوشن ملزمان کے خلاف شواہد پیش کرنے میں ناکام رہی ہے۔
واضح رہے کہ اے ٹی سی نے یکم جنوری 2022ء کو دونوں ملزمان کو جرم ثابت ہونے پر عمر قید اور جرمانے کی سزا سنائی تھی۔
پراسیکیویشن نے اپنے دلائل میں کہا کہ ملزمان نے مدرسے سے واپس آنے والے شہری حسن پر فائرنگ کی تھی، جس سے حسن ہلاک ہو گیا تھا۔
ملزمان کے خلاف 2014ء میں گلشنِ اقبال تھانے میں مقدمہ درج کیا گیا تھا۔
