اسلام آباد (مانیٹرنگ ڈیسک) نگران حکومت نے لاپتا افراد سے متعلق سپریم کورٹ آف پاکستان کے احکامات پر عملدرآمد کیلئے اقدامات شروع کر دیے۔
ذرائع کے مطابق اس سلسلے میں اٹارنی جنرل نے سیکرٹری دفاع اور سیکرٹری داخلہ کو خط لکھا ہے جس میں 3 جنوری 2024 کو سپریم کورٹ کے آرڈر کے پیرا 11 کا حوالہ دیا گیا ہے۔
ذرائع کے مطابق خط میں کہا گیا ہے کہ سپریم کورٹ کے حکم پر تحریری اقرار نامہ جمع کرانے کے لیے ضروری کارروائی کی جائے، سپریم کورٹ نے اب کے بعد کسی شخص کو غیر قانونی لاپتا نہ کرنے کا حکم دیا ہے اور عدالت نے کسی شخص کو غیر قانونی لاپتا نہ کرنے کیلئے تحریری جواب بھی مانگا ہے۔
ذرائع کے مطابق خط میں مزید کہا گیا ہےکہ آرڈرکے پیرا 11 میں وفاقی حکومت کو تحریری جواب جمع کرانے کی ہدایت کی گئی ہے، متعلقہ وزارتوں کے سینئر ترین افسران سے دستخط شدہ تحریری اقرار نامہ مانگا گیا ہے۔
واضح رہے کہ سپریم کورٹ میں لاپتا افراد سے متعلق آمنہ مسعود جنجوعہ اور دیگر نے درخواستیں دائر کی تھیں۔
