لاہور (ڈیلی اردو) وزیراعلیٰ پنجاب سردار عثمان بزدار نے پی پی218ملتان کے ضمنی الیکشن میں کامیابی پر تحریک انصاف کے امیدوار ملک واصف مظہر راں کو مبارکباد دی ہے۔
وزیر اعلیٰ نے کہا ضمنی الیکشن کے نتائج نے ثابت کردیا ہے کہ عوام تحریک انصاف کی قیادت اورپالیسیوں پر اعتماد کرتے ہیں۔انہوں نے کہا کہ آج کے نتیجے سے ثابت ہو گیا کہ عوام شفاف اور عوام کی خدمت کرنے والی مخلص قیادت کے ساتھ ہیں اور تحریک انصاف مقبول ترین جماعت ہے ۔وزیر اعلیٰ نے کہا کہ تحریک انصاف کی اب تک کی شاندار کارکردگی کی بدولت ملتان کے عوام نے ضمنی ا لیکشن میں سرخرو کیاہے۔ضمنی الیکشن میں کامیابی نئے پاکستان اور تبدیلی کے ایجنڈے کی جیت ہے اور مخالف سیاسی جماعتوں کیلئے نوشتہ دیوار ہے۔انہوں نے کہا امید ہے کہ ملک واصف مظہر راں حلقہ کے عوام کی نمائندگی کا بھرپور حق ادا کریں گے۔
واضح رہے کہ ملتان میں پنجاب اسمبلی کی نشست پی پی 218 پر آج ہونے والے ضمنی الیکشن میں پاکستان تحریک انصاف کے امیدوار ملک واصف مظہر راں نے پیپلز پارٹی اور مسلم لیگ ن کے مشترکہ امیدوار ملک ارشد راں کو شکست دے دی ہے ۔ملک واصف مظہر راں نے 46 ہزار 988 ووٹ حاصل کئے جبکہ ان کے مد مقابل امیدوار ملک ارشد راں 39 ہزار 486 ووٹ حاصل کر پائے۔
واضح رہے کہ رواں سال 16 جنوری کوپاکستان تحریک انصاف کے ملک مظہرعباس راں انتقال کر گئے تھے جس کے بعد یہ نشست خالی ہوئی تھی،تحریک انصاف نے ملک مظہرعباس راں کے صاحبزادے ملک واصف مظہر راں کو ٹکٹ دیا تھا جنہوں نے اپنے مرحوم باپ کی چھوڑی ہوئی نشست دوبارہ حاصل کر لی ہے۔
