لندن (ڈیلی اردو/ڈی پی اے/اے ایف پی) یمنی ساحلوں کے قریب ایک بحری آئل ٹینکر کو میزائل سے نشانہ بنایا گیا ہے۔ یہ جہاز یمنی حوثی باغیوں کے زیرقبضہ موخا شہر کے قریب میزائل حملے کا ہدف بنایا گیا۔
میری ٹائم سکیورٹی کمپنی ایمبرے کے مطابق آبنائے باب المندب کے قریب حوثی باغیوں کے زیرقبضہ شہر موخا سے دس ناٹیکل میل دور اس آئل ٹینکر پر ”حملہ‘‘ کیا گیا۔ ایمبرے کی جانب سے جاری کردہ بیان کے مطابق، ”میزائل حملے کے بعد اس جہاز کے اسٹیئرنگ گیئر فلیٹ پر آگ بھڑک اٹھی۔‘‘
برطانوی بحریہ کی میری ٹائم سکیورٹی ایجنسی نے اس سے قبل بتایا تھا کہ ایکبحری جہاز ‘نامعلوم شے لگنے سے معمولی نقصان کا شکار ہوا ہے‘‘۔
برطانیہ کی میری ٹائم ٹریڈ آپریشن ایجنسی (یو کے ایم ٹی او) کے مطابق، ”جہاز اور عملہ محفوظ ہیں اور مقررہ بندرگاہی منزل کی جانب رواں دواں ہیں۔‘‘
واضح رہے کہ غزہ ميں جنگ کے آغاز سے یمن میں متحرک ایران نواز حوثی باغی بحیرہ احمر میں تجارتی جہازوں کو نشانہ بناتے رہے ہیں۔ حوثی باغی اب تک ایسے درجنوں حملے کر چکے ہیں جن کے رد عمل ميںبحری تجارتی راستے کے تحفظ کے لیے امریکہ اور برطانیہ کئی بار یمن میں حوثی باغیوں کے ٹھکانوں پر فضائی حملے بھی کر چکے ہیں۔
