اسلام آباد (ش ح ط) صوبہ خیبر پختونخوا کے ضلع ڈیرہ اسماعیل خان میں دہشت گردوں نے سرکاری بینک لوٹ لیا۔ ملزمان بینک کے عملے کو یرغمال بنا کر لاکھوں روپے لوٹ کر فرار ہو گئے۔
تفصیلات کے مطابق تحصیل درابن میں درازندہ موڑ پر واقع دی بینک آف پنجاب درابن کلاں برانچ میں موٹرسائیکلوں پر سوار 6 نامعلوم مسلح دہشت گردوں نے بینک میں داخل ہو کر چوکیدار سے اسلحہ چھیننے کے بعد عملہ کو یرغمال بنا کر بینک منیجر سے اسلحہ کی نو ک پر 2 لاکھ روپے سے زائد کی رقم اور موبائل چھین لیا اور موقع سے فرار ہوگئے۔
واقعہ کی اطلاع ملتے ہی مقامی پولیس موقع پر پہنچ گئی اور تفتیش شروع کر دی۔
ادھر ڈیرہ اسماعیل خان میں دی بینک آف پنجاب میں طالبان کی دن دہاڑے بینک لوٹنے کی ویڈیو بھی سامنے آگئی، فوٹیجز میں تمام دہشت گردوں کے چہرے واضح ہیں
ڈی پی او ڈیرہ ناصر محمود ستی کا کہنا ہے کہ پولیس واقعے کی تفتیش کررہی ہے، بہت جلد ملزمان تک پہنچنے میں کامیاب ہو جائیں گے۔
