راولپنڈی (ڈیلی اردو) صوبہ پنجاب کے ضلع جہلم میں پنڈدادنخان للہ موٹروے انٹرچینج کے قریب سابق ڈی جی ریسکیو 1122 بریگیڈئیر ریٹائرڈ امیر حمزہ نامعلوم افراد کی فائرنگ سے ہلاک ہوگئے۔
ریسکیو 1122 کے مطابق بریگیڈیئر (ر) امیرحمزہ کی گاڑی پر للہ انٹرچینج کے قریب فائرنگ کی گئی اور وہ موقع پر ہی ہلاک ہوگئے اور گاڑی میں سوار ان کی بیٹی گولیاں لگنے سے شدید زخمی ہیں۔
مزید بتایا گیا کہ مقتول بریگیڈئیر (ر) امیر حمزہ اپنی بیٹی کے ہمراہ جارہے تھے کہ ملزمان نے فائرنگ کردی جبکہ ریسکیو نے فوری موقع پر پہنچ کر امدادی کارروائی کی۔
ریسکیو کا کہنا تھا کہ مقتول کی 21 سالہ بیٹی کے دونوں بازوں پر گولیاں لگی ہیں اور وہ شدید زخمی ہیں۔
ریسکیو ذرائع نے مزید بتایا کہ راولپنڈی بریگیڈئیر ریٹائرڈ امیر حمزہ ریسکیو 1122 کے ڈی جی تعینات رہ چکے ہیں۔
