لاہور (ڈیلی اردو) صوبہ پنجاب میں محرم الحرام میں مجالس کیلئے ایس او پیز جاری کردیے گئے، جس میں تمام حساس مقامات پرواک تھروگیٹس کی تنصیب لازمی قرار دیا ہے۔
تفصیلات کے مطابق محکمہ داخلہ پنجاب نے محرم الحرام میں مجالس کیلئے ایس او پیز جاری کردیے، جس میں امام بارگاہوں اور مجالس کیلئے فول پروف سیکیورٹی انتظامات کی ہدایت کی گئی ہے۔
محکمہ داخلہ نے تمام حساس مقامات پر واک تھروگیٹس کی تنصیب لازمی قرار دیتے ہوئے کہا ہے کہ تمام مجالس کیلئے 3 تہہ پر مشتمل سیکیورٹی کور یقینی بنایا جائے اور مجالس کیلئے ایک داخلی اور خارجی راستہ مختص کیا جائے۔
محکمہ داخلہ کا کہنا تھا کہ منتظمین مجالس سے قبل فزیکل سیکیورٹی چیک کو یقینی بنائیں گے اور مجالس میں آنے والے ہر شہری کومیٹل ڈیٹیکٹر سے لازمی چیک کیا جائے جبکہ داخل ہونے والے ہر شخص کی سی سی ٹی وی سے فوٹیج بنائی جائے۔
لاؤڈ اسپیکر کا صرف مجلس کی حدود تک استعمال، وقت کی پابندی لازمی ہوگی، نیاز، لنگر اور سبیل کی تقسیم سے قبل محکمہ صحت سے چیک کرایا جائے۔
کارپارکنگ مجالس سے کم ازکم 200 میٹر کے فاصلے پر بنائی جائے، مقامی امن کمیٹیاں بھی پرامن انعقاد کیلئے اپنا کردار ادا کریں۔
