کوئٹہ (بیورو رپورٹ) صوبہ بلوچستان کے ضلع قلات کے علاقے اسکلکو میں سیکیورٹی فورسز کی گاڑی پر ہونے والے ایک دھماکے میں ایک اہلکار ہلاک اور چار زخمی ہوگئے۔
قلات کی ضلعی انتظامیہ نے واقعے کی تصدیق کرتے ہوئے ڈیلی اردو کو بتایا کہ اسکلکو کے علاقے میں دھماکا خیز مواد سڑک کنارے نصب کیا گیا تھا جو پھٹنے سے اس کی زد میں سیکورٹی فورسز کی گاڑی آ گئی۔
واقعے کے بعد علاقے میں سیکیورٹی فورسز نے پہنچ کر اسے گھیرے میں لے لیا اور دھماکے کے مقام سے شواہد اکٹھے کرنا شروع کر دیے۔
واقعے کے فوری بعد لاش اور زخمیوں کو ہسپتال منتقل کر دیا گیا ہے۔
ہلاک ہونے والے اہلکار کی شناخت نائیک شفقت کے نام سے ہوئی جبکہ زخمی اہلکاروں میں نائیک شاہ نواز، سپاہی بشیر، سپاہی اویس احمد اور سپاہی محمد افضل شامل ہیں۔
پاکستان فوج کے شعبہ تعلقات عامہ (آئی ایس پی آر) نے تاحال اس حوالے سے کوئی تفصیلات فراہم نہیں کی ہے۔
دوسری جانب کالعدم بلوچ لبریشن آرمی نے حملے کی ذمہ داری قبول کرلی ہے۔
