پشاور (ڈیلی اردو) صوبہ خیبر پختونخوا کے دارالحکومت پشاور میں بھتہ مافیا نے ڈرانے کے لئے دھمکی آمیز خطوط اور فون کالز کے بعد اب تابوت بھجوائے جانے لگے۔
پولیس کے مطابق ناملعوم افراد نے رقم کی وصولی کے لئے ہائوسنگ سوسائٹی کے مالک کے گھر تابوت بھجوا دیئے۔
تفصیلات کے مطابق پشاور میں تھانہ فقیرآباد میں ایک ایسی ایف آئی آر درج کر ائی گئی ہے جس میں ہاؤسنگ سوسائٹی کے مالک غلام قادر نے پولیس کو شکایت کی ہے کہ دہشت گرد دھمکی آمیز خطوط اور کالز کے بعد بھتا نہ دینے پر اب گھر تابوت بجھوا کر سنگین دھمکیاں دینے لگا ہے۔
غلام قادر نے ایف آئی آر میں پولیس کو بتایا کہ انہیں گزشتہ ایک ماہ سے مسلسل دھمکی آمیز کالیں موصول ہورہی ہیں جس میں ملزمان ان سے ایک کروڑ روپے کا مطالبہ کررہے ہیں جب بھتا نہ دیا گیا تو ان لوگوں نے رکشہ ڈرائیور کے ہاتھ ایک خالی ’تابوت‘بجھوا دیا۔
غلام قادر نے مزید بتایا کہ کچھ روز قبل بھی ان کے دفتر پر فائرنگ کی گئی تھی جس میں خوش قسمتی سے کوئی مالی یا جانی نقصان نہیں ہوا۔ غلام قادر کے بقول بھتا خور شخص کال پر خود کو سرکاری ادارے کا آفیسر ظاہر کرتا ہے جس کے باعث ان کو اور ان کی فیملی کو جانی نقصان کا اندیشہ ہے۔
ادھر پولیس کا کہنا ہے انہوں نے ہاؤسنگ سوسائٹی کے گھر تابوت لے جانے والے رکشہ ڈرائیور کو گرفتار کرلیا ہے جس سے مزید تحقیقات جاری ہیں۔
