کراچی (ڈیلی اردو) صوبہ سندھ کے ضلع لاڑکانہ میں کاؤنٹر ٹیررزم ڈیپارٹمنٹ ( سی ٹی ڈی) نے حساس اداروں کی مدد سے کالعدم تنظیم سے تعلق رکھنے والے 2 دہشتگردوں کو گرفتار کرلیا۔
ترجمان سی ٹی ڈی کی جانب سے جاری بیان میں بتایا گیا کہ محکمے نے حساس اداروں کی مدد سے کارروائی کی اور 2 دہشتگردوں کو گرفتار کرلیا۔
ڈی ایس پی سی ٹی ڈی سید اصفر شاہ نے بتایا کہ گرفتار دہشت گردوں کا تعلق کالعدم تنظیم ایس آر اے سے ہے، گرفتار دہشت گردوں کی شناخت جمیل شیخ اور صلاح الدین جتوئی کےنام سے ہوئی ہے۔
انہوں نے بتایا کہ دہشتگردوں کو سم شاخ کے علاقے سے خفیہ اطلاع پر گرفتار کیا گیا، گرفتار دہشت گردوں نے یوم آزادی کے موقع پر مرکزی تقریب اور جیل کو بم سے اڑانے کی پلاننگ کی تھی۔
ان کا کہنا تھا کہ دونوں دہشت گردوں نے 2 ماہ قبل اے ایس پی آفس پر بھی دستی بم سے حملہ کیا تھا، گرفتار دہشتگردوں سے 350 گرام دھماکا خیزمواد، 6 ڈیٹونیٹر، ایک ہینڈ گرنیڈ سیفٹی فیوز، تارنٹ بولٹ، کالا پاوڈر برآمد ہوا ہے۔
ڈی ایس پی سی ٹی ڈی نے بتایا کہ گرفتار دہشتگردوں کو افغانستان کے علاقے قندھار میں 15 روز کی تربیت بھی دی گئی تھی، گرفتار دہشتگردوں کیخلاف 4 مقدمات درج کر لیے گئے ہیں۔
