لاہور (ڈیلی اردو)صوبہ پنجاب کے ضلع میانوالی مکڑوال کے قریب کاؤنٹر ٹیررازم ڈیپارٹمنٹ (سی ٹی ڈی) اور دہشت گردوں کے درمیان فائرنگ کے تبادلے میں کالعدم تنظیم تحریک طالبان پاکستان کے 7 خطرناک دہشت گرد ہلاک ہوگئے۔
ڈیلی اردو کے مطابق ترجمان سی ٹی ڈی کا کہنا تھا کہ کاؤنٹر ٹیررازم ڈیپارٹمنٹ نے انٹیلی جنس بیسڈ کارروائی کی، دہشت گردوں نے سی ٹی ڈی ٹیم پر فائرنگ کردی۔
ترجمان نے بتایا کہ اپنے ساتھیوں کی فائرنگ سے کالعدم ٹی ٹی پی کے 7 دہشت گرد ہلاک ہوگئے جبکہ 8 اندھیرے کا فائدہ اٹھاتے ہوئے فرار ہوگئے۔
ترجمان سی ٹی ڈی کا مزید کہنا تھا کہ دہشت گردوں سے 6 دستی بم، سیفٹی فیوز وائر، 7 کلاشنکوف، گولیاں اور بارودی مواد برآمد ہوا ہے۔
سی ٹی ڈی نے علاقے کو گھیرے میں لے کر سرچ آپریشن بھی شروع کر دیا ہے۔
