راولپنڈی (ڈیلی اردو) صوبہ بلوچستان کے ضلع ژوب میں سیکیورٹی فورسز اور دہشت گردوں کے درمیان شدید فائرنگ کے تبادلے میں 2 دہشت گرد ہلاک ہو گئے جبکہ ضلع پشین میں کامیاب آپریشن کرتے ہوئے 5 ہشت گرد کو گرفتار کرلیا گیا۔
پاکستانی فوج کے شعبہ تعلقات عامہ (آئی ایس پی آر) کے مطابق 17 اکتوبر کو ضلع ژوب میں آپریشن میں سیکیورٹی فورسز کے ساتھ فائرنگ کے تبادلے میں 2 خوارجی دہشت گرد مارے گئے۔
آئی ایس پی آر کا کہنا تھا کہ ژوب میں ہلاک دہشت گردوں سے اسلحہ اور گولہ بارود بھی برآمد کیا گیا ہے۔
پاکستانی فوج کے شعبہ تعلقات عامہ نے بتایا کہ سیکیورٹی فورسز نے ضلع پشین میں خفیہ معلومات کی بنیاد پر کامیاب آپریشن کیا اور 5 دہشت گردوں کو گرفتار کرلیا۔
آئی ایس پی آر کا کہنا تھا کہ سیکیورٹی فورسز نے دہشت گردوں سے اسلحہ،گولہ بارود، دھماکا خیز مواد برآمد کر لیا، فورسز نے دہشت گردوں سے 3 خودکش جیکٹس بھی قبضے میں لے لیں۔
آئی ایس پی آر نے بتایا کہ گرفتار دہشت گرد سیکورٹی فورسز اور بے گناہ شہریوں کو نشانہ بنانےکی منصوبہ بندی کر رہے تھے۔
پاکستانی فوج کے شعبہ تعلقات عامہ کا کہنا تھا کہ سیکیورٹی فورسز معصوم شہریوں کو دہشت گردی سے بچانے کے لیے ثابت قدم ہیں۔
ادھر، وزیراعظم نے پشین میں دہشت گردوں کے خلاف کامیاب کارروائی پر سیکیورٹی فورسز کے افسران و جوانوں کی پذیرائی کی۔
وزیراعظم شہباز شریف کی بڑی تعداد میں اسلحہ و دھماکا خیز مواد ضبط کرنے پر بھی افسران و جوانوں کی تعریف کی، ان کا کہنا تھا کہ پوری قوم ملک کو فتنہ الخوارج سے پاک کرنے کے لیے پاک فوج کو خراجِ تحسین پیش کرتی ہے۔
