لاہور (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) نے پنجاب کے مختلف شہروں میں کارروائی کرتے ہوئے کالعدم ٹی ٹی پی کے 2 انتہائی خطرناک دہشت گردوں سمیت 7 کا گرفتار کر لیا۔
تفصیلات کے مطابق ترجمان سی ٹی ڈی کا کہنا تھا کہ پنجاب کے مختلف شہروں میں 129 انٹیلی جنس بیسڈ آپریشن کیے گئے اور 7 دہشت گردوں کو گرفتار کیا گیا۔
ترجمان کا کہنا تھا کہ محکمہ انسدادِ دہشت گردی پنجاب نے کارروائی لاہور، بھکر، اٹک، وہاڑی، بہاولپور اور جھنگ میں کی، ترجمان کا مزید کہنا تھا کہ صوبائی دارالحکومت اور بھکر سے کالعدم تحریک طالبان پاکستان (ٹی ٹی پی) کے 2 انتہائی خطرناک دہشت گردوں کو اسلحہ اور باروی مواد سمیت گرفتار کیا گیا ہے۔
ترجمان سی ٹی ڈی نے بتایا کہ دہشت گردوں سے دھماکا خیز مواد، اسلحہ، آئی ای ڈی بم، 2 موبائل فون، ممنوعہ پمفلٹ اور نقدی بھی برآمد ہوئی ہے۔
ترجمان سی ٹی ڈی کے مطابق گرفتار ہونے والے دہشت گردوں کی شناخت حیات اللّٰہ، شین خان، محمد صدیق، ظہور احمد، اکرام خان، مبشر علی اور خان کے ناموں سے ہوئی ہے۔
واضح رہے کہ 5 اکتوبر کو سی ٹی ڈی پنجاب نے صوبے کے مختلف شہروں میں انٹیلی جنس کی بنیاد پر 134 آپریشن کرتے ہوئے 18 دہشت گرد گرفتار کیا تھا، جن میں کالعدم تحریک طالبان پاکستان کے 3 انتہائی خطرناک دہشت گرد بھی شامل تھے۔
ترجمان سی ٹی ڈی نے بتایا تھا کہ صوبائی دارالحکومت لاہور، خوشاب، گوجرانوالہ، پاک پتن، بہاول نگر، راولپنڈی، فیصل آباد، شیخوپورہ، منڈی بہاؤالدین، میانوالی میں کی گئی۔
