کوئٹہ (ڈیلی اردو) پاکستان کے صوبہ بلوچستان کے علاقے تربت میں نامعلوم دہشت گردوں کی جانب سے مدرسے میں پھینکا گیا دستی بم دھماکے سے پھٹ گیا جس کے نتیجے میں 4 بچے زخمی ہوئے ہیں۔
پولیس کے مطابق تربت کے علاقے ملک آباد میں قائم مدرسے جامعہ التوحید میں نامعلوم افراد دستی بم پھینک کر فرار ہوئے جو وضو خانے کے قریب گر کر زور دار دھماکے سے پھٹ گیا۔
پولیس حکام کے مطابق دھماکے میں 4 بچے زخمی ہوئے جنہیں طبی امداد کیلیے اسپتال منتقل کردیا گیا ہے۔
ذرائع کے مطابق دستی بم دھماکے سے قبل مہتمم مدرسہ جامعہ التوحید کے مفتی شاہ میر پر مسلح دہشت گردوں نے فائرنگ کر دی، تاہم وہ قاتلانہ حملے میں بال بال بچ گئے ہیں۔
واضح رہے کہ کالعدم تنظیم کی جانب سے مفتی شاہ میر کو متعدد بار دھمکیاں دی گئی تھیں۔
واقعے کے بعد پولیس اور سیکیورٹی فورسز کی بھاری نفری نے جائے وقوعہ پہنچ کر شواہد اکھٹے کیے جبکہ ملزمان کی تلاش کیلیے سرچ آپریشن شروع کردیا۔
