یروشلم (ڈیلی اردو/ڈی پی اے) اسرائیلی فورسز نے آج ہفتے کے روز یہ دعویٰ کیا ہے کہ انہوں نے جنوبی لبنان میں حزب اللہ کی ایک سرنگ کا پتا لگا کر کے اسے تباہ کر دیا ہے۔ اسرائیلی فورسز کے مطابق حزب اللہ کی ایلیٹ رضوان فورس کے زیر استعمال زیر زمین راستہ تقریباً 100 میٹر لمبا تھا اور یہ حزب اللہ کے کمانڈ سینٹر تک رسائی کا ایک ذریعہ تھا جسے اب تباہ کر دیا گیا ہے۔ اسرائیلی فورسز نے یہ بھی کہا کہ انہیں اس سرنگ میں سے دھماکہ خیز مواد، راکٹ لانچرز، رائفلیں، راکٹ اور نگرانی کے آلات بھی ملے ہیں۔
اسرائیلی فوج نے ایسی تصاویر جاری کی ہیں، جن میں فوجیوں کی طرف سے روشن کی گئی ایک تنگ سرنگ میں ہتھیار دکھائے گئے۔ تاہم اسرائیلی فوج نے یہ نہیں بتایا کہ یہ سرنگ لبنان میں کہاں واقع تھی۔
اسرائیل اور ایران نواز لبنانی ملیشیا حزب اللہ کے درمیان ایک ماہ سے جنگ بندی جاری ہے۔ معاہدے کے تحت اسرائیل کی زمینی فوجیں بتدریج لبنان سے واپس بلائی جائیں گی۔ اسرائیلی فورسز کا دعویٰ ہے کہ ایک سو کلو میٹر پر محیط یہ سرنگ حزب اللہ کے کمانڈ سینٹر کی طرف جانے کا ایک خفیہ راستہ تھا۔ دونوں فریق ایک دوسرے پر جنگ بندی معاہدے کی خلاف ورزیوں کے الزامات عائد کر رہے ہیں۔ اسرائیل کے مطابق وہ اب بھی پڑوسی ملک کے جنوب میں موجود خطرات کے خلاف فوجی کارروائی کر رہا ہے۔ اسرائیلی فورسز کے مطابق جنگ بندی معاہدے کے تحت اس خطے میں آپریشن کی اجازت دی گئی ہے۔
