ویٹیکن سٹی ( ڈیلی اردو/اے ایف پی/ڈی پی اے) پوپ فرانسس نے ایسٹر سنڈے کے موقع پر ویٹیکن سٹی کے سینٹ پیٹرز اسکوائر میں مختصر طور پر اجتماعی دعائیہ تقریب میں شرکت کی۔ جب پوپ فرانسس سینٹ پیٹرز باسیلیکا کی بالکونی میں لائے گئے، تو وہاں موجود ہزاروں عقیدت مندوں میں خوشی کی لہر دوڑ گئی۔ پوپ نے دھیمی آواز میں کہا، “بھائیو اور بہنو، ایسٹر مبارک ہو!”
کیتھولک چرچ کے پیروکار ہر سال ایسٹر سنڈے کے موقع پر سینٹ پیٹرز اسکوائر میں جمع ہوتے ہیں، جسے مسیحی کیلنڈر کا اہم ترین تہوار سمجھا جاتا ہے۔ ویٹیکن سٹی کے مطابق، پوپ فرانسس حالیہ دنوں میں ڈبل نمونیا کے علاج کے بعد صحت یاب ہو رہے ہیں، جس کے باعث ایسٹر کی عبادات کی قیادت ایک اعلیٰ درجہ کے کارڈینل کو سونپ دی گئی تھی۔
پوپ کا غزہ میں جنگ بندی کی اپیل
پوپ فرانسس نے اپنے ایسٹر پیغام میں غزہ کی موجودہ صورت حال کو “ڈرامائی اور افسوسناک” قرار دیتے ہوئے فلسطینی عسکریت پسند گروپ حماس سے باقی یرغمالیوں کو رہا کرنے کا مطالبہ کیا۔ پوپ نے دنیا بھر میں بڑھتی ہوئی سامیت دشمنی کے رجحان کو “تشویشناک” قرار دیتے ہوئے اس کی مذمت کی۔
اپنے پیغام میں انہوں نے اسرائیلی اور فلسطینی عوام کے مصائب سے اپنی قربت کا اظہار کیا اور دونوں فریقوں سے جنگ بندی اور یرغمالیوں کی رہائی کا مطالبہ کیا۔ پوپ فرانسس نے کہا، “میں متحارب فریقوں سے اپیل کرتا ہوں: جنگ بندی کا مطالبہ کریں، یرغمالیوں کو رہا کریں اور بھوک سے مرنے والے لوگوں کی مدد کے لیے آئیں جو امن کے مستقبل کے خواہشمند ہیں۔”
امریکی نائب صدر کی پوپ فرانسس سے ملاقات
اس سال ایسٹر کا تہوار خصوصی اہمیت رکھتا ہے کیونکہ کیتھولک چرچ نے 2025 کو جوبلی یا مقدس سال قرار دیا ہے۔ ویٹیکن کے مطابق، تقریباﹰ ایک ملین زائرین اس ہفتے کے آخر میں روم میں موجود ہیں، جن میں امریکی نائب صدر جے ڈی وینس بھی شامل ہیں۔ نائب صدر نے اتوار کے روز پوپ فرانسس سے مختصر ملاقات کی، جس میں دونوں رہنماؤں نے ایسٹر کی نیک خواہشات کا تبادلہ کیا۔ جے ڈی وینس نے 2019 میں کیتھولک عقیدہ قبول کیا تھا اور وہ اس سال اپنے خاندان کے ساتھ روم میں ایسٹر کی تقریبات میں شریک ہو رہے ہیں۔
پوپ فرانسس کی صحت
88 سالہ پوپ فرانسس کو ایک ماہ سے زائد روم کے جیمیلی ہسپتال میں گزارنے کے بعد چار ہفتے قبل ہسپتال سے جانے کی اجازت دی گئی تھی۔ ڈاکٹروں کا کہنا ہے کہ انہیں مکمل صحت یاب ہونے کے لیے مزید وقت درکار ہے۔ حالیہ دنوں میں پوپ کی آواز کمزور ہو گئی ہے، لیکن وہ آکسیجن کی نالی کے بغیر دو مرتبہ عوامی تقریبات میں شرکت کر چکے ہیں۔
پوپ فرانسس، جو دنیا کے 1.4 بلین سے زیادہ کیتھولک عقیدت مندوں کے روحانی رہنما ہیں، سن 2013 میں اپنے انتخاب کے بعد پہلی بار ہولی ویک کی زیادہ تر تقریبات میں شرکت سے محروم ہوئے ہیں۔
