اسرائیلی فضائی حملے میں حوثی چیف آف اسٹاف عبدالکریم الغماری متعدد ساتھیوں سمیت ہلاک

صنعا (ڈیلی اردو/رائٹرز) یمن میں ایران نواز حوثی باغیوں کے خلاف اسرائیلی فضائی حملے میں زخمی ہونے والے حوثی فوج کے چیف آف اسٹاف، میجر جنرل محمد عبدالکریم الغماری ہلاک ہو گئے۔

ان کی ہلاکت کی تصدیق مختلف ذرائع نے کر دی ہے، جس کے بعد اسرائیل اور حوثی باغیوں کے درمیان کشیدگی میں مزید اضافہ ہو گیا ہے۔

متحدہ عرب امارات کے شہر دبئی سے جمعہ، 17 اکتوبر کو موصولہ اطلاعات کے مطابق، حوثی باغیوں نے بھی تسلیم کیا ہے کہ میجر جنرل الغماری ہلاک ہو گئے ہیں۔ دیگر اعلیٰ حوثی رہنماؤں کی طرح ان پر بھی یمن میں قریب ایک دہائی سے جاری خانہ جنگی کے باعث اقوام متحدہ کی جانب سے پابندیاں عائد تھیں۔

اسرائیل کے وزیرِ دفاع، اسرائیل کاٹز نے تصدیق کی ہے کہ الغماری اگست کے اواخر میں اسرائیلی فضائی حملے کے دوران شدید زخمی ہوئے تھے اور بعد ازاں انہی زخموں کے باعث ان کی موت واقع ہوئی۔

اسرائیلی وزیرِ اعظم بینجمن نیتن یاہو نے بھی ایک بیان میں الغماری کی ہلاکت کی تصدیق کی ہے۔

اسرائیل نے 28 اگست کو یمن میں حوثی قیادت کو نشانہ بنانے کے لیے ان کے متعدد اہم مراکز پر فضائی حملے کیے تھے۔

یہ حملے اس پس منظر میں کیے گئے تھے کہ غزہ میں حماس اور اسرائیل کے درمیان جاری جنگ کے دوران ایران نواز حوثی باغی مسلسل حماس کی حمایت کرتے رہے ہیں اور گزشتہ دو برسوں کے دوران کئی بار اسرائیل کی سمت ڈرون اور میزائل داغ چکے ہیں۔

اگست کے آخر میں کیے گئے ان فضائی حملوں میں حوثیوں کی حکومت کے وزیرِ اعظم احمد الرہوی اور ان کی کابینہ کے تقریباً نصف ارکان بھی ہلاک ہو گئے تھے۔

تاہم، اسرائیلی حکومت اور حوثی باغیوں، دونوں میں سے کسی نے بھی یہ واضح نہیں کیا کہ میجر جنرل عبدالکریم الغماری کی ہلاکت کب واقع ہوئی۔