حوثیوں کا سعودی عرب کے نجران ایئرپورٹ پر ڈرون حملہ

صنعاء/ریاض (ڈیلی اردو رپورٹ) یمن میں ایران کے حمایت یافتہ حوثی گروپ نے سعودی عرب کے نجران ایئرپورٹ پر ڈرون حملہ کیا ہے۔

حوثی باغیوں کے فوجی ترجمان یحییٰ سریع نے ایک بیان میں کہا کہ ڈرون کے ذریعے جنوبی سعودی عرب میں واقع نجران ایئرپورٹ کے ایک حساس ہدف کو نشانہ بنایا گیا۔

ان کے مطابق نجران ایئرپورٹ کو اس لیے نشانہ بنایا گیا کیونکہ وہاں سے یمن کے صوبوں حجہ اور صعدہ کی فضائی حدود میں ڈرون پروازیں کی جا رہی تھیں۔

سعودی حکام نے خبر لکھے جانے تک اس واقعے پر کوئی باضابطہ ردعمل جاری نہیں کیا، جبکہ حملے کے نتیجے میں کسی جانی یا مالی نقصان کی بھی سرکاری طور پر تصدیق نہیں کی گئی۔

یہ پیش رفت ایسے وقت میں سامنے آئی ہے جب بحیرہ احمر اور خطے میں کشیدگی برقرار ہے اور یمن میں جاری تنازع کے باعث سرحدی علاقوں میں سکیورٹی خدشات میں اضافہ دیکھا جا رہا ہے۔

حالیہ ہفتوں کے دوران حوثی باغیوں نے سعودی عرب اور بحیرہ احمر میں جہاز رانی سے متعلق متعدد کارروائیاں کی ہیں۔ حوثیوں نے سعودی بحری ناکہ بندی کا اعلان کرنے کے ساتھ بعض سعودی ٹینکروں کو بھی نشانہ بنانے کی کارروائیاں کیں، جس کے باعث بحیرہ احمر میں تجارتی جہاز رانی اور علاقائی سلامتی کے حوالے سے خدشات میں اضافہ ہوا ہے۔

یاد رہے کہ یمن میں کئی برسوں سے جاری تنازع کے دوران حوثی گروپ متعدد بار سعودی عرب کے ہوائی اڈوں، فوجی تنصیبات، تیل کی تنصیبات اور سرحدی علاقوں کو میزائلوں اور ڈرون حملوں کا نشانہ بناتا رہا ہے، جبکہ سعودی اتحاد بھی حوثیوں کے زیرِ کنٹرول علاقوں میں فضائی کارروائیاں کرتا رہا ہے۔