افغانستان: کابل میں فوجی ایئرپورٹ کے باہر خودکش دھماکا، طالبان کے 9 اہلکاروں سمیت 14 افراد ہلاک

کابل (ڈیلی اردو) افغانستان کے دارالحکومت کابل میں فوجی ایئر پورٹ کے باہر مبینہ خودکش دھماکے کے نتیجے میں طالبان فورسز کے 9 اہلکاروں سمیت 14 افراد ہلاک اور متعدد زخمی ہوئے ہیں ۔

عاجل | مصدر أمني أفغاني للجزيرة: 10 قتلى و8 جرحى جراء تفجير عند مدخل المطار العسكري وسط كابل

— الجزيرة – عاجل (@AJABreaking) January 1, 2023

افغانستان میں یہ واقعہ اتوار کے روز ایک ایسے وقت پر رونما ہوا، جب دنیا سال نو کی خوشیاں منا رہی تھی۔

وزارت داخلہ کی طرف سے بتایا گیا ہے کہ ابتدائی معلومات کے مطابق اس دھماکے کے نتیجے میں متعدد افراد زخمی یا ہلاک ہوئے ہیں۔ تاہم جانی نقصان کی درست تعداد ابھی تک واضح نہیں ہو سکی۔

یہ دھماکا افغان دارالحکومت کابل کے ایک ایسے حساس مقام پر ہوا ہے، جہاں سے کچھ دور ہی کابل کا بین الاقوامی ہوائی اڈہ واقع ہے۔ طالبان کی طرف سے بتایا گیا ہے کہ اس دھماکے کے بارے میں حقائق جاننے کی کوشش کی جا رہی ہے۔

وزارت داخلہ کے ترجمان نے اتوار کے دن کابل میں صحافیوں کو بتایا، ”آج صبح کابل کے ملٹری ایئر پورٹ پر دھماکا ہوا ہے۔ اس کی وجہ سے متعدد افراد شہید اور زخمی ہوئے ہیں۔‘‘ انہوں نے کہا کہ تفتیش مکمل ہونے کے بعد ہی اس دھماکے کی وجوہات کا تعین ہو سکے گا۔

اس علاقے کے قریب رہنے والے لوگوں نے میڈیا کو بتایا کہ اتوار کی صبح تقریباﹰ آٹھ بجے ایک زور دار دھماکا سنا گیا، جس کے بعد سکیورٹی فورسز نے اس حساس علاقے کو اپنے گھیرے میں لے لیا۔ ایک رہائشی کے مطابق دھماکہ اتنا شدید تھا کہ قریب ہی واقع کئی گھروں کی کھڑکیاں بھی ٹوٹ گئیں۔

یہ ابھی تک واضح نہیں کہ یہ دھماکا کوئی حادثہ تھا یا کسی جنگجو گروہ کا حملہ۔

اگست 2021 میں افغانستان پر طالبان کے قبضے کے بعد کچھ عرصے تک وہاں حالات بہتر رہے اور حملوں میں بھی کمی ہوئی تھی۔ تاہم حال ہی میں افغانستان میں پرتشدد واقعات میں ایک مرتبہ پھر اضافہ نوٹ کیا گیا ہے۔

طالبان کی حکومت والے افغانستان میں ایسے حملوں کے لیے ‘اسلامک اسٹیٹ خراسان‘ کو ذمہ دار قرار دیا جاتا ہے۔ خود کو دہشت گرد تنظیم داعش سے وابستہ قرار دینے والا یہ گروہ ماضی میں کئی پرتشدد حملوں کی ذمہ داری قبول کر چکا ہے۔