امریکا اور پاکستان کا دوطرفہ سکیورٹی تعاون اور بارڈر مینجمنٹ میں اشتراک بڑھانے پر اتفاق

اسلام آباد (ڈیلی اردو) امریکا اور پاکستان نے دوطرفہ سکیورٹی تعاون اور بارڈر مینجمنٹ کے شعبے میں اشتراک بڑھانے پر اتفاق کرتے ہوئے بارڈر سکیورٹی، کوسٹل گارڈز اور دیگر قانون نافذ کرنے والے اداروں کو جدید امریکی آلات سے لیس کرنے کا فیصلہ کیا ہے۔

یہ فیصلہ ہفتے کے روز وفاقی وزیر داخلہ محسن نقوی سے امریکا کی سفیر نیٹلی بیکر کی سربراہی میں اعلیٰ سطح امریکی وفد کی ملاقات کے دوران کیا گیا۔ ملاقات میں پاک امریکا تعلقات، باہمی مفادات اور سکیورٹی تعاون کے مختلف پہلوؤں پر تفصیلی تبادلہ خیال ہوا۔

ملاقات میں دوطرفہ سکیورٹی تعاون اور بارڈر مینجمنٹ کے ضمن میں اشتراک مزید مضبوط بنانے، جبکہ امریکی ادارے اینٹی ٹیررسٹ اسسٹنس پروگرام کے ساتھ جاری تعاون کو وسعت دینے پر اتفاق کیا گیا۔

اسی طرح بیورو آف انٹرنیشنل نارکوٹکس اینڈ لا انفورسمنٹ کے ساتھ جاری تعاون کو مزید مؤثر بنانے اور مستقبل میں ہر سطح پر پاک امریکا تعاون کو فروغ دینے کے لیے کوآرڈینیشن بہتر بنانے کا فیصلہ بھی کیا گیا۔

اجلاس کے دوران ایف آئی اے، فیڈرل کانسٹیبلری اور سائبر کرائم ایجنسی کے افسران کے لیے تربیتی پروگرامز پر گفتگو کی گئی، جبکہ امریکا کے تعاون سے ایف آئی اے میں سینٹر فار ٹرانس نیشنل کرائم اور اکیڈمی کے قیام سے متعلق امور پر بھی تبادلہ خیال ہوا۔

ملاقات میں بارڈر سکیورٹی، کوسٹل گارڈز اور دیگر اداروں کو جدید امریکی آلات فراہم کرنے پر بھی اتفاق کیا گیا۔

اس موقع پر وزیر داخلہ محسن نقوی نے کہا کہ بیرون ملک جرائم میں ملوث افراد کی نشاندہی جدید سافٹ ویئر اور ٹیکنالوجی کی مدد سے کی جائے گی۔