امریکا نے پاکستان کیلئے ملٹری ٹریننگ پروگرام بحال کردیا

واشنگٹن (ڈیلی اردو/نیوز ایجنسی) امریکہ نے پاکستان کے لیے قریبا دو سال بعد اپنا ملٹری ٹریننگ اور تعلیمی پروگرام بحال کر دیا۔

امریکی سٹیٹ ڈیپارٹمنٹ کے مطابق ٹرمپ انتظامیہ نے پاکستان کے لیے قریبا 2 سال بعد اپنا ملٹری ٹریننگ اور تعلیمی پروگرام بحال کر دیا۔ یہ فیصلہ وزیراعظم عمران خان کی امریکی صدر ڈونلڈ ٹرمپ کے ساتھ اس سال ہونے والی ملاقات اور امریکہ اور پاکستان کے دہائیوں پر مشتمل دیرینہ تعلقات کو مدنظر رکھتے ہوئے کیا گیا۔ امریکہ نے افغانستان سے امریکی فوج کے انخلاء کے لیے ہونے والے مذاکرات میں کردار ادا کرنے پر بھی پاکستان کو بھی بہت سراہا۔

حال ہی میں اس مقصد کے لیے طالبان اور امریکہ کے مذاکرات بحال ہوئے ہیں۔ اسٹیٹ ڈیپارٹمنٹ کے زیر انتظام چلنے والا بین الاقوامی ملٹری ایجوکیشن اور ٹریننگ پروگرام (آئی ایم ای ٹی) پروگرام پاکستان کے لیے تقریباً 2 بلین ڈالر امریکی سکیورٹی امداد کا ایک چھوٹا سا حصہ تھا۔

جنوری 2018 میں پاکستان کے لیے امریکی سکیورٹی امداد معطل کر دی گئی تھی۔

امداد معطل کیے جانے کی وجہ ٹرمپ انتظامیہ کی جانب سے پاکستان پر جنگجوؤں کے خلاف اقدامات اٹھانے کے لیے دباؤ ڈالنا تھا۔

خیال رہے کہ اس سال کے آغاز میں بھارتی نیم عسکری دستے پر ہونے والے ایک حملے میں 40 سے زیادہ افراد ہلاک ہو گئے تھے، جس کے بعد امریکہ نے پاکستان پر دہشتگردوں کے خلاف مستقل اور ناقابل واپسی اقدامات اٹھانے پر زور دیا تھا۔