امریکی سینٹرل کمانڈ کا حماس سے فوری طور پر غیر مسلح ہونے کا مطالبہ

واشنگٹن (نمائندہ  ڈیلی اردو) امریکی سینٹرل کمانڈ (سینٹکام) نے فلسطینی تنظیم حماس پر زور دیا ہے کہ وہ صدر ڈونلڈ ٹرمپ کے 20 نکاتی ’’غزہ امن منصوبے‘‘ کے تحت فوری طور پر ہتھیار ڈال کر غیر مسلح ہو جائے۔

سینٹکام کے کمانڈر ایڈمرل بریڈ کوپر نے بدھ کے روز جاری کردہ بیان میں کہا کہ ’’یہ موقع خطے میں مستقل امن کے قیام کے لیے فیصلہ کن ہے۔‘‘ 

ان کے مطابق امریکا، قطر، مصر اور اردن کے ساتھ مل کر غزہ میں مکمل جنگ بندی کے عملی اقدامات پر کام کر رہا ہے۔

بیان میں مزید کہا گیا کہ ’’حماس اگر امن کے لیے مخلص ہے تو اسے اپنی مسلح کارروائیاں ختم کرنی ہوں گی۔‘‘

تاہم حماس کے ترجمان حازم قاسم نے ردِعمل دیتے ہوئے کہا کہ ’’ہم پرامن شہریوں پر نہیں بلکہ اسرائیلی جارحیت کے خلاف مزاحمت کر رہے ہیں، غیر مشروط ہتھیار ڈالنا ممکن نہیں۔‘‘

عرب ذرائع کے مطابق واشنگٹن کی کوشش ہے کہ غزہ میں عبوری انتظام قطر اور مصر کی نگرانی میں تشکیل دیا جائے تاکہ بحالی اور امدادی عمل تیز کیا جا سکے۔