امریکی صدر اور ایرانی صدر نے امن معاہدے پر دستخط کر دیے

پیرس/تہران (ڈیلی اردو/اے پی/روئٹرز/اے ایف پی) امریکی صدر ڈونلڈ ٹرمپ اور ایرانی صدر مسعود پزشکیان نے جنگ بندی میں مزید 60 دن کی توسیع اور آبنائے ہرمز کو دوبارہ کھولنے کے لیے ایک ابتدائی امن معاہدے پر دستخط کر دیے ہیں۔

رپورٹس کے مطابق ڈونلڈ ٹرمپ نے ایران کے ساتھ ابتدائی معاہدے کی ہارڈ کاپی پر دستخط کیے، جس کا مقصد امریکہ اور ایران کے درمیان جنگ بندی کو مزید 60 دن کے لیے برقرار رکھنے کے ساتھ ساتھ آبنائے ہرمز کی بحالی کی راہ ہموار کرنا اور ایران کے جوہری پروگرام سے متعلق مذاکرات کا آغاز کرنا ہے۔

فرانسیسی صدر ایمانوئل ماکروں کی جانب سے دیے گئے عشائیے میں شرکت کے بعد محل ورسائی سے روانگی کے وقت ٹرمپ  نے صحافیوں سے گفتگو کرتے ہوئے کہا، ’’معاہدے پر دستخط ہو چکے ہیں۔‘‘

دوسری جانب ایران کی وزارت خارجہ کے ترجمان نے تصدیق کی کہ ایرانی صدر مسعود پزشکیان نے 

معاہدے پر ڈیجیٹل دستخط کیے ہیں۔

ادھر پاکستان کے وزیرِ اعظم شہباز شریف نے کہا کہ فریقین کے درمیان دستخط کے بعد معاہدہ فوری طور پر نافذ العمل ہو گیا ہے۔ واضح رہے کہ پاکستان نے امریکہ اور ایران کے درمیان جنگ بندی میں ایک اہم ثالث کا کردار ادا کیا ہے۔ 

معاہدے کو خطے میں کشیدگی کم کرنے، بین الاقوامی بحری تجارت کے لیے اہم سمجھی جانے والی آبنائے ہرمز کو دوبارہ فعال بنانے اور ایران کے جوہری پروگرام پر سفارتی مذاکرات کے آغاز کی جانب ایک اہم پیش رفت قرار دیا جا رہا ہے۔

امریکہ اور ایران کے مابین ایران جنگ کے خاتمے کے لیے 60 روزہ جنگ بندی کے ابتدائی امن معاہدے کی ’اسلام آباد مفاہمتی دستاویز‘ پر اس مسلح تنازعے‌ میں ثالثی کرنے والے جنوبی ایشیائی ملک پاکستان کے وزیر اعظم شہباز شریف نے بھی جعمرات 18 جون کے روز دستخط کر دیے۔

اسلام آباد میں وزیر اعظم کے دفتر کی طرف سے سوشل میڈیا پلیٹ فارم ایکس پر جاری کردہ ایک پوسٹ میں کہا گیا کہ پاکستانی سربراہ حکومت نے اس معاہدے پر دستخط اس حیثیت سے کیے کہ ایران کے ہمسایہ اور واشنگٹن اور تہران دونوں کے متعمد ملک پاکستان نے اس جنگ بندی کے لیے مسلسل کوششوں میں کلیدی کردار ادا کیا۔

شہباز شریف نے اس دستاویز پر دستخط اسی ایم او یو پر امریکہ کے صدر ڈونلڈ ٹرمپ اور ایران کے صدر مسعود پزشکیان کی طرف سے دستخطوں کے بعد کیے۔

ایکس پر اپنی پوسٹ میں پاکستانی وزیر اعظم کے دفتر کی طرف سے 19 سیکنڈ کا ایک ایسا ویڈیو کلپ بھی شیئر کیا گیا، جس میں شہاز شریف ایران جنگ کے خاتمے کے لیے ابتدائی امن ڈیل پر دستخط کرتے ہوئے دیکھے جا سکتے ہیں۔

وزیراعظم شہباز شریف نے اس حوالے سے ایکس پر اپنی پوسٹ میں کہا، ’’مجھے یہ اعلان کرتے ہوئے فخر محسوس ہو رہا ہے کہ آج امریکہ اور ایران کے درمیان تاریخی ’اسلام آباد مفاہمت کی یادداشت‘ پر الیکٹرانک طور پر دستخط ہو گئے ہیں۔‘‘

انہوں نے مزید کہا، ’’اس یادداشت پر دونوں ممالک کے معزز صدور نے دستخط کیے ہیں اور ایک ثالث کے طور پر میں نے بھی اس کی توثیق کی ہے۔ متعلقہ حکومتوں کی اعلیٰ ترین سطح پر اس معاہدے پر دستخط تنازعے کے سفارتی حل کے لیے فریقین کے عزم کو ظاہر کرتے ہیں۔‘‘

شہباز شریف نے مزید کہا، ’’اسلام آباد مفاہمت کی یادداشت فوری طور پر نافذ العمل ہو گی اور پہلے قدم کے طور پر ایران فوری طور پر آبنائے ہرمز کو دوبارہ کھول دے گا اور امریکہ فوری طور پر بحری محاصرہ ختم کر دے گا۔‘‘

شہباز شریف نے اس اہم پیش رفت پر امریکی صدر ڈونلڈ ٹرمپ اور ایرانی صدر مسعود پزشکیان دونوں کا شکریہ ادا کیا۔ انہوں نے فیلڈ مارشل سید عاصم منیر کا بھی شکریہ ادا کیا، جنہوں نے ان کے بقول انتھک کوششوں، بےلوث لگن اور کلیدی کردار کا مظاہرہ کیا۔