انڈونیشیا نے غیر ازدواجی جنسی تعلق قانوناً جرم قرار دے دیا

جکارتہ (ڈیلی اردو/ڈی پی اے/اے پی/اے ایف پی/رائٹرز) انڈونیشیا نے آج منگل کو جن متنازعہ فوجداری قوانین کو منظوری دے دی ان میں صدر کی توہین اور غیر ازدواجی جنسی تعلقات کو جرم قرار دیا گیا ہے۔ ناقدین کا کہنا ہے کہ نئے قوانین سے انڈونیشیا میں جمہوری آزادیوں پر ضرب لگی ہے۔

Indonesia bans sex outside marriage in new criminal code https://t.co/0wK7nw6fiH pic.twitter.com/9aNhJncZId

— Reuters (@Reuters) December 6, 2022

فوجداری قوانین میں ترمیم کے مخالفت کرنے والوں نے انڈونیشیا کے اراکین پارلیمان سے ان متنازعہ قوانین کی توثیق نہ کرنے کی اپیل کی تھی۔ ان قوانین کے تحت غیر ازدواجی جنسی تعلقات رکھنے نیز شادی کے بغیر ساتھ رہنے والے جوڑوں کو قید کی سزا دی جائے گی۔

Indonesia set to punish sex before marriage with jail time https://t.co/gbVXdIdQA2

— BBC News (World) (@BBCWorld) December 2, 2022

تمام اہم سیاسی جماعتوں نے اس بل کی حمایت کی جس کے بعد پارلیمان نے قوانین میں ترمیم کو منظوری دے دی۔ حالانکہ دنیا کی سب سے بڑی مسلم آبادی والے ملک میں ناقدین کا کہنا ہے کہ ان قوانین سے جمہوری آزادیوں کو خطرہ لاحق ہو گیا ہے۔

گوکہ پارلیمان نے آج نئے فوجداری قوانین کی توثیق کر دی تاہم ان کا اطلاق تین برس میں ہو گا۔

انڈونیشیا میں اس وقت زنا قانوناً جرم ہے تاہم قبل از شادی جنسی تعلق قائم کرنے پر پابندی نہیں۔ اس وقت جن قوانین پر عمل درآمد ہوتا ہے ان میں سے بیشتر کا تعلق نیدرلینڈز کے نوآبادیاتی قوانین سے ہے۔

قانون اور انسانی حقوق کے نائب وزیر ایڈورڈ عمر شریف نے نئے قوانین کی منظوری کے بعد کہا، “ہم 59 برسوں سے اس کا انتظار کر رہے تھے۔”

“A huge setback to Indonesian democracy.”

Indonesia is expected to criminalize sex outside marriage, punishable by up to a year in prison, and ban unmarried couples from living together.

This is a violation of individual human rights.https://t.co/KRKEKyGh9Q

— Human Rights Watch (@hrw) December 2, 2022

نئے قوانین کے تحت غیر ازدواجی جنسی تعلقات کے لیے ایک برس قید اور شادی کے بغیر ساتھ رہنے والوں کو چھ ماہ قید کی سزا ہو سکتی ہے۔ تاہم پولیس اس حوالے سے کسی شکایت کی تفتیش اسی وقت کرے گی جب خاندان کے کسی رکن کی جانب سے شکایت درج کرائی جائے گی۔

نیدرلینڈز سے آزادی حاصل کرنے کے بعد سے ہی انڈونیشیا میں فوجداری قوانین پر نظر ثانی کا معاملہ موضوع بحث رہا ہے۔

فوجداری قوانین پر نظر ثانی کرنے والے کمیشن کے سربراہ بمبانگ ووریانتو کا کہنا تھا، “پرانے قوانین ڈچ ثقافت کا حصہ تھے اور اب یہ قابل عمل نہیں رہ گئے ہیں۔”

نئے قوانین کا اطلاق انڈونیشی شہریوں اور غیر ملکیوں دونوں پر یکساں طور پر ہو گا۔

ریاست کی توہین، بدامنی پیدا کرنے اور فیک نیوز پھیلانے پر قید کی سزا

نئے قوانین میں صدر یا ریاستی اداروں کی توہین کرنے اور ریاستی آئیڈیالوجی کے برخلاف موقف کا اظہار کرنا بھی قابل سزا جرم ہو گا۔

#UPDATE Indonesia's parliament has approved legislation to criminalise extra-marital sex and the cohabitation of unmarried couples

Critics fear the rules could have a major impact on the LGBTQ community in Indonesia, where gay marriage is not allowed https://t.co/ugNTbs01Vb pic.twitter.com/u7NuMERs3S

— AFP News Agency (@AFP) December 6, 2022

نئے قانون میں صدر یا نائب صدر کے “وقار پر حملہ کرنے” والے کو زیادہ سے زیادہ تین برس تک قید کی سزا ہو سکتی ہے۔

حکومت کی توہین کرنے والے کو 18ماہ تک قید کی سزا ہو سکتی ہے جب کہ سماجی بدامنی پیدا کرنے کے جرم میں تین برس تک قید کی سزا دی جا سکتی ہے۔ ” فیک نیوز” پھیلانے کے جرم میں چھ برس تک قید کی سزا ہو سکتی ہے۔

پیر کے روز ملک کے مختلف شہروں میں سینکڑوں لوگوں نے مظاہرے کیے اور نئے قوانین کو ختم کرنے کا مطالبہ کیا۔

حقوق انسانی گروپوں کا اعتراض

انڈونیشیا میں گوکہ غالب آبادی مسلمانوں کی ہے تاہم اس ملک میں پروٹیسٹنٹ اور کیتھولک مسیحی، ہندومت، بودھ مت اور کنفیوشس ازم کو بھی تسلیم کیا جاتا ہے۔

گوکہ مسلمانوں کی اکثریت اسلام کی جدید تشریحات پر عمل کرتی ہے تاہم حالیہ برسوں میں مذہبی قدامت پسندی میں بھی اضافہ ہوا ہے اور اس کا اثر ملکی سیاست پر بھی پڑا ہے۔

ناقدین کا کہنا ہے کہ نئے قوانین سے انڈونیشیا بنیاد پرستی کی طرف بڑھ سکتا ہے حالانکہ ملکی آئین کی جڑیں سیکولرازم میں موجود ہیں۔

نئے قوانین سے ملک میں ایل جی بی ٹی کیو کمیونٹی پر بھی اثر پڑنے کے خدشات ظاہر کیے جارہے ہیں کیونکہ انڈونیشیا میں ہم جنس شادیاں غیر قانونی ہیں۔ آچے صوبے کو چھوڑ کر ملک کے دیگر حصوں میں ہم جنس پرستی غیر قانونی نہیں ہے لیکن اسے بالعموم حرام سمجھا جاتا ہے۔